2 tug neeg ntseeg Nyab Laj raug ntes nyob pem toj siab, nyob nruab nrab hauv Nyab Laj teb

Hnub tim 1 lub 6 hli no, Siu Yúi thiab Siu Dok uas yog haiv neeg Moos Tas Nyas (Montagnard) raug tseem hwv ntes nyob hauv lub xeev Gia Lai uas yog thaj tsam toj siab nyob nruab nrab hauv Nyab Laj teb. Siu Yúi yog ib tug Xib Hwb qhia Ntuj kev cai npuab lub Koom Txoos Plos Tes Taas, nws muaj 68 xyoo. Hos Siu Dok nws muaj 40 xyoo. 

Raws lub Koom Haum Christianily Solidarity Worldwide tshaj tawm, mas ob tug txiv neej no raug lub txim tias nkawd txw cov neeg toj siab uas nyob nruab nrab hauv Nyab Laj teb, kom lawv cais ciam dej ciam av thiab faib ua ib lub teb chaws tshiab. Kev ntes nkawd zaum no yog qhov xwm txheej kawg hauv tseem hwv koom tshaj txoj kev ua rau cov neeg Moos Tas Nyas vim cov neeg Moos Tas Nyas nyob toj siab lawv tsis kam mus koom cov tsev teev hawm uas zwm rau tseem hwv. Kev ua li no tau nthuav dav mus dhau Nyab Laj ciam teb, txog qhov muab yawg Y Qinh Bdap uas nws yog ib tug Xib Hwb qhia kev ntseeg haiv neeg Moos Tas Nyas nyob Thaib teb xa rov qab mus Nyab Laj teb, kom tau muab nws kaw nyob Nyab Laj teb. Qhov no ua rau muaj kev sib cav sib ceg heev kawg. International Christian Concern (ICC) hais tias “Thov kom sawv daws sib pab thov Ntuj rau ob tus neeg ntseeg no, thov Ntuj rau cov neeg Moos Tas Nyas nyob Nyab Laj teb, cov khiav ua neeg thoj nam nyob Thaib teb, thiab cov khiav mus nyob thoob ntiaj teb uas tab tom raug kev iab hiam.”