Leej Ntshiab As Nres los yog As Nres As, lo lus no yog lus Hes Las. Lub npe As Nres As txhais tias : Yog ib tug txiv neej yawg tiag.
Leej Ntshiab As Nres yog ib tug neeg siab loj siab dav thiab coj tus. As Nres yog Yos Nas uas nyob Npes Xais Das tus tub. Yog Pob Zeb tus kwv thiab yav tag los nws yog Zam ntxuav plig ib tug thwj tim. Tom qab no nws tau ua Huab Tais Yes Xus ib tug Thwj Tim raws Yes Xus qab. Nws yog tus coj nws tus tij laug Pob Zeb los paub Huab Tais Yes Xus (Z 1 : 35 – 42)
Hais txog kev sib cav sib ceg nyob hauv cov Hauv Paus Xa Lus, mas kuj muaj tsawg kawg. As Nres yog tus hais rau Huab Tais Yes Xus nyob ntawm tsoom sim xub ntiag tias : muaj ib tug me nyuam uas nws muaj 5 lub ncuav mov thiab 2 tug ntses qhuav xwb. Lo lus no zoo li As Nres txhob txwm hais li ntawd kom Huab Tais Yes Xus ua hwj huam yees ntxwv. As Nres tau nrog Fis Lis Pos mus tshaj Ntuj Lus ntau qhov chaw. Nws coj lwm cov haiv neeg los ntseeg txog Huab Tais Yes Xus.
Kuj hnov tias Leej Ntshiab As Nres tau mus tshaj Ntuj Lus nyob Hes Las thiab ob peb lub teb chaws nyob As Xias Nrab. Nws tuag ua Yes Xus tim khawv nyob hauv lub nroog Pas Tas Xos. Luag muab nws khi rau ib tug ntoo khaub lig. Vim li ntawd, thaum ib tsoom neeg pom tus khaub lig (X), mas sawv daws hais tias yog Leej Ntshiab As Nres tus ntoo cuam. Nws raug tsim txom nyob ntawm ntoo khaub lig 2 hnub, tsis kav nws tseem qhuab qhia cov neeg nyob ib ncig kom sawv daws ntseeg txog Tswv Ntuj. Vim li ntawd, Lav Xias teb thiab Aas Kiv qaum teb thiaj xaiv Leej Ntshiab As Nres ua tus tuav pov hwm lawv 2 lub teb chaws.
Vaj Qhia Paj Lug 6 tau muab Leej Ntshiab As Nres cov pob txha rau lub Cheeb Koom Txoos nyob sab hnub tuaj. Leej Ntshiab As Nres cov pob txha raug khaws tseg nyob hauv lub tuam tsev teev Ntuj Leej Ntshiab Pob Zeb. Tom qab no raug xa mus rau lub nroog Pas Las Xos lawm. Leej Ntshiab As Nres yog Huab Tais Yes Xus thawj tug Thwj Tim, qhov no Leej Ntshiab Pob Zeb ua tim khawv tau. Vim tias lub sij hawm uas Huab Tais Yes Xus hu As Nres ua nws Thwj Tim, mas yog 4 teev yuav tsaus ntuj. Tom qab Huab Tais Yes Xus hu As Nres tag, mas nws khiav mus hais rau Pob Zeb uas yog nws tus tij laug. As Nres hais tias : kuv tau ntsib tus Mes Xias lawm. Mes Xias yog txhais tias ‘Leej Pleev.’ Ces As Nres coj Pob Zeb mus ntsib Huab Tais Yes Xus (Z 1 : 41).
Kev vam txog Leej Ntshiab As Nres los pab, mas yuav hais li no :
Leej Ntshiab As Nres tus muaj Tswv Ntuj lub txiaj ntsim, koj yog thawj tug uas lees hais tias Huab Tais Yes Xus yog Tswv Ntuj tus yaj thiab koj raws nraim Huab Tais Yes Xus, koj nrog Leej Ntshiab Zam thiab nws cov phooj ywg ua ke. Koj tau nrog Huab Tais Yes Xus nyob thawj hnub thiab tas koj sim neej. Tam sim no koj tau nyob ntawm Tswv Ntuj lub Ceeb Tsheej nyob mus li lawm. Koj tau coj Pob Zeb uas yog koj tus tij laug los cuag Huab Tais Yes Xus, thiab tseem muaj coob leej uas raws Yes Xus qab. Thov koj coj peb mus cuag Tswv Ntuj, thov koj pab peb coj cov haiv neeg los cuag Tswv Ntuj, kom lawv nyiam Tswv Ntuj thiab siv lawv lub neej, txoj sia los ua hauj lwm rau Tswv Ntuj. Thov koj qhia peb kom peb to taub txog tus Ntoo Cuam Ntshiab; ces peb thiaj yuav txawj ris peb tus ntoo cuam nyob hauv peb lub neej niaj hnub. Tus Ntoo Cuam Ntshiab yuav coj peb kev mus cuag Tswv Ntuj. Ua li!
Tus sau : Muas Lauj, Zoo Tswv Zov Yaj
