LEEJ NTSHIAB KAS TAS LIS NAS AS LES XAS NTIAS (St. Catherine of Alexandria)

Hnub tim 25 lub 11 hlis, lub Koom Txoos hwm Leej Ntshiab Ka Tas Lis Nas hauv As Les Xas Ntias.

Kas Tas Lis Nas yug xyoo 287, nws yog tus vaj kav lub nroog As Les Xas Ntias hu ua Koos Xas Tus tus ntxhais. Kas Tas Lis Nas tau hais tseg tias nws tus txij nkawm mas yuav tsum yog neeg muaj suab npe, nplua nuj thiab tsum yog neeg txawj ntse muaj laj lim tswv yim zoo dua nws; tsis yog li mas nws tsis yuav leej twg. Yog li, Kas Tas Lis Nas niam thiaj xa Kas Tas Lis Nas mus cuag ib tus Leej Choj. Tus Leej Choj no hais tias muaj ib tus txiv neej nto moo thiab zoo nraug cuag li lub hnub tsom, muaj laj lim tswv yim thoob ntuj, muaj nyiaj txiag thoob teb. Tab sis yuav yuav tus txiv neej no tau, mas yuav tsum txais Cim Ntxuav thiaj yuav tau.

Thaum Kas Tas Lis Nas hnov li ntawd, nws thiaj txais Cim Ntxuav. Kas Tas Lis Nas txais Cim Ntxuav tas nws thiaj npau suav pom nws nce mus saum Ntuj, mus nrog Huab Tais Yes Xus sib khaib.

Thaum Kas Tas Lis Nas hloov los yuav siab tshiab lawm, nws mus rau Los Mas. Kas Tas Lis Nas mus ntuas kom tus vaj Mes Xes Nias txhob rau txim rau cov neeg ntseeg Yes Xus. Kas Tas Lis Nas muaj  peev xwm ntuas tus vaj Mes Xes Nias tus poj niam thiab cov kws txuj Los Mas tig los yuav lub siab tshiab tas, tab sis Kas Tas Lis Nas ntuas tsis tau tus vaj Mes Xes Nias. Ces cov neeg Los Mas hloov siab tshiab thiaj raug txiav caj dab tas, hos Kas Tas Lis Nas raug ntes kaw hauv tsev loj faj. Txawm tias Kas Tas Lis Nas raug kaw lawm los, tus neeg twg tuaj xyuas nws mas lawv hloov siab tshiab rov qab tas li. Tus vaj Mes Xes Nias coj Kas Tas Lis Nas mus tsim txom npaum cas los Kas Tas Lis Nas tsis ua cas li, thaum kawg thiaj coj Kas Tas Lis Nas mus txiav caj dab. Kas Tas Lis Nas tuag thaum nws muaj hnub nyoog 18 xyoo.

Tom qab tuag lawm, muaj ib tus Tshiab nqes los npo Kas Tas Lis Nas lub cev mus tso saum lub roob Xis Nais.

Tus Txhais : Muas Lauj, Zoo Tswv Zov Yaj