Helena Agnieszka Kmiec tus ua Tswv Ntuj tub txib, tim 31 lub 8 hli 2026
Servant of God Helena Agnieszka Kmiec
Helena Agnieszka Kmiec tus ua Tswv Ntuj tub txib.
Helena tus ua Tswv Ntuj tub txib, nws yug hnub tim 9 lub 2 hlis xyoo 1991 nyob hauv lub nroog Krakow. Nws yog tus ntxhais tim 2 ntawm Jan Kmiec thiab Agnieszka Bejska. Nws niam tuag tsis pes tsawg lub lis piam tom qab yug nws.
Tom qab no nws txiv rov yuav Barbara Zają ua niam tshiab. Helena tau txais kev tu saib xyuas nyob hauv tsev neeg uas muaj kev nyiam kev hlub, kev sov siab thiab tshaj lwm yam uas yog txoj kev ntseeg. Helena hais tias : nws muaj 3 leeg niam, xws li niam yug nws, Barbara uas yog niam tshiab thiab Niam Mab Liab.
Tsev neeg Kmiec muaj kev ntseeg ruaj khov thiab Jan Zając uas yog tus Tswv Qhia nyob Krakow, yog Helena txiv hlob.
Pib hauv xyoo 1998 uas nws kawm ntawv nyob hauv qib qis thiab qib nrab. Yog lub tsev kawm ntawv Kav Tos Liv hauv lub nroog Libiąż nyob Pos Kas teb los yog Poland teb. Nws kuj tau txais pob nyiaj pab kev kawm ntawv nyob Aas Kiv teb 2 xyoos thiab. Helena yog ib tug ntxhais kawm uas tshaj lij kawg, tab sis nws khiav tsis kam kawm ntawv. Tsis kav nws tseem tau txais pob nyiaj pab kev kawm ntawv, kom rov qab mus kawm txuas ntxiv qib nrab ntu kawg nyob Aas Kiv teb. Tsis tas li ntawd, nws kuj muaj peev xwm txog kev ntaus paj nruag thiab, ces nws raug txais mus kawm nyob hauv lub tsev kawm ntaus paj nruag. Nws kheev kheev hu nkauj thiab ntaus Kis Taj rau pab tub hu nkauj sib xyaws suab hauv tsev teev Ntuj. Qee zaus lawv kuj tawm rooj fiv ntuj los yog nrhiav qhov tseeb ntawm lub nroog Libiaz mus rau Jasna Góra uas nyob Pos Kas teb, vim yog lub tsev teev Ntuj loj nto npe nyob Pos Kas teb.
Txawm li cas kuj xij, Teresa Kmiec uas yog nws tus niam hluas hais rau tus sau npe tias : Helena muaj kev sib raug zoo nrog Pos Kas teb zoo kawg. Tab sis tom qab tsis tau txais lus teb txais nws mus kawm ua kws kho mob nyob Oxford, mas nws rov mus tsev thiab mus kawm hais txog chemical engineering thiab Technology nyob Gliwice. Tom qab nws kawm tiav, Helena tau ua txoj hauj lwm tos txais neeg nyob hauv dav hlau. Txawm tias Helena nyiam paj nruag, nyiam mus kev thiab nyiam nce roob, tsis kav yam uas nws nyiam tshaj yog kev pab luag tej.
Li ntawd, nws thiaj pib nyiam ua hauj lwm pab luag tej. Xyoo 2016, thaum txog hnub ntawm cov tub ntxhais hluas hnub nyob ntiaj teb, uas npaj nyob hauv lub nroog Krakow, thaj tsam hauv nws qub zos hauv lub nroog Libiaz poob nyob hauv kev kub ntxhov, vim cov neeg ua hauj lwm tsis muaj hnub so. Txiv Plig Król pub sij hawm me me rau nws txiav txim siab, ces thiaj thov kom Helena txais txoj hauj lwm ntawd. Ntseeg tias Helena yuav ua tau, vim nws txawj ntau xeem lus thiab nrog neeg sib haum xeeb tau zoo.
Thaum rov los txog Pos Kas teb, Helena xav tias yuav ua txoj hauj lwm tos txais neeg nyob hauv dav hlau ntxiv mus. Nrhiav txiv yuav thiab ua lub neej mus lawm yav tom ntej. Tab sis lub caij nws tab tom txiav txim siab li ntawd, Helena tau sau piav txog nws lub hom phiaj hauv nws lub neej tseg rau ib daim ntawv uas lawv tshawb pom tom qab nws tuag lawm. Xws li kawm lus Xyis Pas Yas los yog lus Spain, teeb tsa Kav Tos Liv cov hauj lwm rau cov txais neeg nyob hauv dav hlau thiab kev ua Leej Ntshiab.
Hnub tim 8 lub 1 hlis xyoo 2017, Helena pib ua hauj lwm nyob Bolivia teb. Nws npaj siab nyob ntawd 6 lub hlis, yog tom qab nws rov los txog tsev ob peb hnub.
Tab sis hnub tim 24 lub 1 hlis 2017, nws raug tub sab xuas riam nkaug tuag nyob hauv lub tsev kawm ntawv Bojanowski, uas yog lub Koom Haum Leej Niam tus ntshiab huv ua tus saib nyob Pacata, hauv lub nroog Cochabamba.
Muaj kev tshaj tawm tias : ob tug tub sab tua neeg nkag mus hauv lub tsev kawm ntawv kom tau lwg ub no. Tab sis raug tus ntxhais no tiv yam tsis nco ras, ces ib tug tub sab thiaj xuas riam nkaug nws tuag.
Helena tuag thaum nws ua hauj lwm zaum kawg nrog lub Koom Haum Salvatorian, yog thaum nws muaj 26 xyoo. Tom qab nws tuag, tseem hwv tsab cai sau tias :
“Nws lub suab npe hauv fab lub neej ntshiab huv thiab kev muab tus kheej cev rau Tswv Ntuj, ua kom lub Koom Txoos sawv nyob hauv cov neeg ntseeg. Coob leej tau vam txog nws nyob hauv kev thov Ntuj.”
Tseem hwv tsab cai xaus cov lus tias : “Tus piv txwv ntawm kev ua Tswv Ntuj tub txib, yog lub zog txhawb siab rau ib tsoom neeg. Tshwj xeeb tshaj yog cov tub ntxhais hluas. Yuav ua raws Tswv Ntuj lub hom phiaj hauv kev ntshiab huv nrog kev muab siab rau, thiab kev txiav txim siab hauv kev ua hauj lwm pub dawb thiab kev ua tub txib.”
