Tus zoo tswv zov yaj
Zam ntawv Moo Zoo zaj 10 : 1-10.
Thaum Fas Las Oos nug lawv txog lawv tej hauj lwm, mas Yos Xes cov tij laug teb tias : “Koj cov qhev yog neeg yug yaj. Tas peb sawv daws thiab peb cov yawg koob.” Peb cov yawg koob yog neeg yug yaj, Mais Xes yog tus saib xyuas pab yaj thiab Das Vis raug xaiv tawm los ntawm lub tshav zaub thaum nws tab tom yug yaj.
Nyob hauv As Xias Nrab txheej thaud, tus thawj coj uas txhawj xeeb txog nws tsoom pej xeem raug saib tias yog tus zov yaj. Nyob hauv Mes Xos Pos Tas Mias tej ntaub ntawv sau cim tseg, lo lus tias ‘zov yaj’ kheev kheev txhais tias ‘saib xyuas’. Fas Las Oos raug hu ua ‘tus zov yaj ntawm txhua haiv neeg.’ Tus zov yaj uas saib xyuas nws tsoom pej xeem. Thiab lub Cim ntawm tus zov yaj lub hwj chim, nws tuav rab pas nrig nyob ntawm nws txhais tes nyob His Xas Lais. Tus duab no feem ntau kheev kheev siv rau cov thawj tub rog thiab cov nom tswv nrog rau Tswv Ntuj tib si.
Zaj nkauj teev Ntuj ntawd zoo raug siab kawg. “Kuv tus tswv zov yaj ntawm His Xas Lais, thov koj mloog mas ! Nws yog tus coj Tswv Ntuj haiv neeg xws li pab yaj.” Kev nyob nyab xeeb uas hais nyob hauv zaj nkauj ntawd ntxim siab kawg. “Tswv Ntuj yog kuv tus tswv zov yaj. Kuv tsis tshaib tsis nqhis dab tsi.” Tab sis qhov poob siab yog nyob hauv Ntawv Cog Lus Qub, tsis tau hais txog tus vaj kav pej xeem tias nws yog tus zov yaj li. Lub npe no tseg rau tib tug vaj xwb, nws yog tus Mes Xias yav tom ntej uas yuav hloov Das Vis. Tom qab nws tsawm lus phem rau tus tswv uas coj tsoom pej xeem mus rau kev puas tsuaj, nws cog lus tias nws yuav ua tus tswv zov yaj kiag. Kom tau sau tas cov yaj uas sib tawg thiab coj lawv mus rau lub tshav zaub mos. Nws tshaj tias : “Kuv yuav ua kom muaj ib tug tswv zov yaj sawv los thiab kuv yuav tsa nws ua pab yaj ntej, coj lawv mus nog zaub, yog kuv leej tub Das Vis. Nws yuav coj cov yaj mus nog zaub thiab nws yuav ua tus tswv zov lawv. Kuv, Huab Tais, yuav yog lawv tus Tswv Ntuj, hos kuv leej tub Das Vis yuav ua vaj nyob nruab nrab hauv lawv.”
Yes Xus hais tias : “Kuv yog lub qhov rooj ; tus twg nkag los ntawm kuv, mas nws yuav txais kev cawm, nws yuav nkag tau rau hauv thiab tawm tau los, nws yuav nrhiav tau lub tshav zaub mos.”
Nws yuav muaj ncuav mov noj tsau plab thiab tau haus cov dej txhawv ntawm txoj sia nyob mus li los. Ces nws yuav tau txais kev cawm.
Yes Xus yog lub qhov rooj nqaim, vim nws xav tau kev muab tus kheej txi thiab kev nyiam kev hlub tsis muab hlob uas muab rau lwm tus. Yog tib lub qhov rooj mus txog txoj sia. Lwm cov qhov rooj puav leej muaj ntxiab, yog qhov coj mus rau txoj kev tuag. Yes Xus thiaj hais tias : “Nej mus hauv lub qhov rooj nqaim mog ! Txoj kev coj neeg mus rau qhov tuag yog txoj kev loj kev dav, muaj coob leej taug txoj kev ntawd. Hos txoj kev coj neeg mus rau txoj sia, yog txoj kev nqaim kev ti. Muaj tsawg leej xwb thiaj nrhiav tau txoj kev ntawd taug.”
Kwv tij Hmoob sawv daws ! Hnub no peb tham txog Zam ntawv Moo Zoo zaj 10, qib 1 txog qib 10 los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua, nyob zoo nej sawv daws !
