Kev pauv ntxeev, kom tau txhim kho Nyab Laj teb cov txheej txheem. (A ‘revolution’ to streamline the apparatus in Vietnam)

Kev pauv ntxeev, kom tau txhim kho Nyab Laj teb cov txheej txheem. (A ‘revolution’ to streamline the apparatus in Vietnam)

Cov lus uas raug hais txog ntau tshaj nyob Nyab Laj teb tsis ntev los no, yog “kev pauv ntxeev kom tau txhim kho tseem hwv txoj cai.” Kev txhim kho tus txheej txheem ntawm tseem hwv, yog qhov tsim nyog ua sai thiab yog kev vam meej. Zoo li Nyab Laj teb uas nkag mus rau txheej tshiab, thiab tsim kom muaj qhov ruaj khov nyob hauv xeev ntuj thiab hauv ntiaj teb. Nov yog kev ntsia pom ntawm cov kws txawj ntse hauv lub teb chaws thiab lwm teb chaws.

Txij thaum pab kav xwm nruab nrab koom tshaj Nyab Laj uas yog pab tim 12, tau txais kev pom zoo hauv txoj cai tim 18 lub 10 hli xyoo 2017. Lawv vam tias yuav pauv ntxeev thiab txhim kho txoj cai tseev tsim kom zoo thiab zoo dua qub. Nyab Laj tau muab siab rau hauv kev txhim kho tus txheej txheem kev tseev tsim ntawm lawv tus kheej. Tab txawm muaj qhov kho mus tau me ntsis li pom meej tseeb, tsis kav pab neeg txhim kho kuj tsis muaj kev sib haum xeeb, ntxhov quav niab thiab muaj ntau theem txheej txheem. Ua kom muaj kev nyiag noj nyiaj, kev nkim nyiaj thiab tshwm sim lwm yam tsis zoo. Hauv kev lag luam tom qab pauv ntxeev los yuav luag 40 xyoo, Nyab Laj tej kev lag luam txhab ntxiv li ntawm 460,000 plhom dos las nyob hauv xyoo 2023. Nyab Laj teb yog ib lub nyob hauv 40 lub teb chaws uas muaj kev lag luam loj tshaj nyob ntiaj teb no. Thiab yog thawj 5 txoj kev lag luam ntawm lub Koom Haum Leej Haum Kuj nyob As Xias toob fab naj. Tej toob xib lag luam hauv lub teb chaws nce siab txog 4,300 plhom dos las, thiab cov neeg pluag txom nyem tshuav li ntawm yuav luag 3 feem pua lawm xwb.

Kev txo yam ntxhov quav niab ntawm tseem hwv, yog txoj cai koom tshaj Nyab Laj los ntev niaj ntau xyoo. Txawm li cas kuj xij, yog caij nyoog ntev uas ua kom lub tswv yim no pib sawv thiab saib zoo li yog muaj nyob hauv daim ntawv xwb. Yog vim qhov tseeb cov hauj lwm nthuav dav yam tsis tu ncua. Txij lub qab xyoo 2024 los, Hanoi tau ua thawj yam hauj lwm hauv kev pauv ntxeev ntawm tseem hwv tus txheej txheem. Daws kho txoj cai tshiab thiab kav tas cov pwm tsav 14 lub pwm tsav.

Cov pwm tsav thiab lwm pab pawg no tab tom raug kev txo neeg ua hauj lwm thiab kev pauv ntxeev. Qee pab yuav tsum raug kho dua tshiab tas nrho. Ntawd yog qhov laij thawj tias vim li cas cov neeg Nyab Laj thiaj hu cov xwm txheej no ua “Kev pauv ntxeev”. Qee leej kuj muab los piv rau cov xwm txheej kev pauv ntxeev Doi Moi (Kev pauv ntxeev tshiab), hauv cov xyoo 1980 thiab.

Tam sim no Nyab Laj teb muaj pwm tsav thiab chaw ua hauj lwm 22 lub. Muaj cov rooj pwm tsav 22 lub rooj zaum thiab lwm pwm tsav 110 lub rooj zaum, ces pom tias lawv muaj neeg ua hauj lwm coob kawg. Yog muab piv rau tej lub teb chaws uas muaj pej xeem li ntawm 100 plhom leej. Muab piv yooj yooj yim li As Mes Lis Kas teb, muaj pej xeem 345 plhom leej. Tab sis lawv muaj cov pwm tsav ua hauj lwm thiab tseem hwv nruab nrab yog 21 qhov chaw xwb. Txhua txhia qhov chaw tsuas muaj ib tug thawj coj thiab cov pab hauv kev ua hauj lwm. Nyab Laj teb npaj siab yuav txo cov pwm tsav kom tshuav 13 lub pwm tsav thiab lwm fab hauj lwm li 3 pab.

Kev pauv ntxeev zaum no xav tias yuav pab kom tseem hwv kev ua hauj lwm mus tau zoo thiab muaj txiaj ntsim qab hau dua qub. Kev pauv ntxeev no tseem ceeb heev, tab sis nws tsis yog qhov txawv rau tsoom pej xeem, vim kev pauv ntxeev no tsim nyog ua los ntev lawm. Nyob hauv cov lus kawg uas muaj npe tias :

“Yiag txias, tab tom haum, kev ua hauj lwm, txi txiv zoo.”

Tus thawj coj pab nom To Lam tau hais txog qhov cheem tsum hauv kev coj tus cuj pwm, yog tus piv txwv ntawm pab nom nruab nrab, pab nom lub Koom Haum, lub pwm tsav txoj cai hauv lub teb chaws thiab tseem hwv. Nws hais tias yog tsis muaj kev pauv ntxeev daws kho cov nom, kev txhim kho teb chaws kuj tsis tshwm sim. Xav tias cov nom thiab tseem hwv cov neeg ua hauj lwm ze 100,000 leej yuav raug tawm ntawm lawv txoj hauj lwm, vim kev kav cov hauj lwm thiab kev pauv ntxeev ntawm tseem hwv. Yog qhov yuam nias cov kiab khw tub zog nyob hauv xyoo no loj kawg. Qhov loj yog tom qab kev so ntawm Suav lub Tsiab Peb Caug, thiab yog lub caij ntiav tub zog coob tshaj hauv lub xyoo.

Lub hauv xyoo 2025 no, Tran Van uas yog ib tug tub tseem hwv nyob Hanoi pib nrhiav hauj lwm tshiab. Vim nws qhov chaw ua hauj lwm npaj pauv ntxeev thiab teeb meem kev sib koom ntawm cov Koom Haum. Tab txawm muaj kev paub los ntau xyoo, tsis kav Van kuj yog ib tug nyob hauv pab neeg yuav raug rho tawm, vim kev txo hauj lwm kom neeg tshuav tsawg.

Van hais tias : “Thaum kuv hnub nyoog dhau 45 xyoo lawm, kev nrhiav hauj lwm uas tsis yog tseem hwv cov hauj lwm nyuab kawg. Qhov kev txhawj xeeb ntawd loj heev, tab sis kuv tsis muaj lwm txoj kev tawm. Kuv yuav tsum hloov tus kheej, tsis hais dab tsi yuav tshwm sim kuj xij. Kuv yuav tsum muaj hauj lwm ua, kom tau yug kuv tsev neeg.” Ua rau Van tsis muaj siab nrhiav hauj lwm tshiab ua. Tiag tiag mas nws yuav tsum nrhiav hauj lwm ua, tab sis nws npaj siab qhib ib lub Koom Haum uas nws paub tej hauj lwm zoo, kom nws muaj hauj lwm ua ntxiv mus.

Txawm li cas kuj xij, qhov teeb meem loj ntawm nws yog tsis muaj peev nyiaj txiag txaus. Nws ua tseem hwv cov hauj lwm los tau 20 xyoo, nws tsuas khaws tau me ntsis nyiaj thiab pib ua cov hauj lwm me me xwb. Ces yog qhov nws yuav tsum xav txog tias ntshe yuav muab vaj tse coj mus yuam nyiaj hauv cov tuam txhab ceev nyiaj. Kev tawm ntawm tseem hwv txoj hauj lwm hauv nws lub neej, yog kev tawm ntawm nws kev tau zoo nyob. Tab sis kuj yog lub sij hawm hloov tus kheej thiab tau soj ntsuam txog pej xeem. Kev pauv ntxeev li hais no, lub hom phiaj yog txhim kho kev ua hauj lwm kom zoo, kom tau txiaj ntsim qab hau hauv tseem hwv cov hauj lwm. Muaj tseem hwv cov tub ua hauj lwm li ntawm 100,000 leej tawm mus ua hauj lwm nyob hauv tej hauj lwm uas yog neeg ntiag tug. Ces yuav ua rau kev txais tub zog ua hauj lwm muaj teeb meem nyob hauv ob peb lub hlis tom ntej no.

Kev pauv ntxeev txhim kho tseem hwv txoj cai los yog Doi Moi 2, yog kev pauv ntxeev uas Hanoi tsim nyog yuav coj mus ua ntev lawm. Kev pauv ntxeev zaum no meej tseeb, tab sis kev yuav ua kom tiav yog qhov nyuab kawg. Lo Tam uas yog tus thawj tswj thiab nws pab nom ntsib kev txhawj xeeb ua ntxhov quav niab. Tshwj xeeb tshaj yog cov neeg ua hauj lwm, vim tsoom pej xeem Nyab Laj 10 feem pua los kwv yees li 8 txog 9 plhom leej yog ua tseem hwv cov hauj lwm. Hais txog Nyab Laj txoj kev tseev tsim yav tom ntej, nws yog qhov ntxhov kawg. Tej zaum txoj kev pauv ntxeev no yuav ua rau muaj kev tsiv siab thiab kev sib txeeb lub hwj chim nyob hauv cov tseem hwv. Kwv tij Hmoob sawv daws ! Hnub no peb tham txog kev pauv ntxeev daws kho tus txheej txheem nyob Nyab Laj teb los xaus li no xwb. Lwm zaus peb mam sib ntsib dua, nej sawv daws nyob zoo !