ZAJ NYEEM HNUB TIM 9 LUB 8 HLI 2024
HNUB NCO TXOG LEEJ NTSHIAB ES LIS XAS NPES NYIAM NTOO CUAM
COV LUS NYOB HAUV MAS TAIS NTAWV MOO ZOO (MT 16: 24-28)
Kwv tij Hmoob sawv daws, yog nej mloog nraim lub Moo Zoo hauv lub lis piam no, nej yuav to taub tias ua cas hnub no Huab Tais Yes Xus thiaj hais tias Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.”
Nyob hauv Hnub Ob hauv lub Lis Piam, peb hais tias Huab Tais Yes Xus hlub tsoom sid, ces nws hais kom cov thwj tim muab lawv cov mov los faib rau tsoom sid tau noj. Nyob hauv Hnub Peb hauv lub Lis Piam, peb hais tias Leej Txiv Tswv Ntuj hais rau Pob Zeb, Yas Kos, thiab Zam kom mloog Huab Tais Yes Xus; yog kom lawv nrauj lawv thiab zoo siab ris lawv txoj kev txom nyem uas yog lawv tus ntoo cuam. Hnub Plaub hauv lub Lis Piam peb hais tias tus poj niam Kas Nas Has tuaj thov Huab Tais Yes Xus pab cawm nws tus ntxhais. Huab Tais Yes Xus pom nws lub siab ntseeg thiab nws tso siab ua tiag thov mas Huab Tais Yes Xus pub rau nws raws li nws lub siab xav. Nag hmo yog Hnub Tsib, peb hais tias Pob Zeb hnov Huab Tais Yes Xus hais tias cov txwj laus yuav muab Huab Tais Yes Xus tua, mas Pob Zeb ntshai tsam Huab Tais Yes Xus tuag ces lawv txoj kev cawm haiv His Xas Lais tsis tsheej, mas nws yuav tsis tau ua tub ncig raws li nws xav ces Pob Zeb thiaj cheem Huab Tais Yes Xus.
Hnub no, Huab Tais Yes Xus thiaj hais qhia cov thwj tim tias yog lawv xav raws Huab Tais Yes Xus tiag mas lawv yuav tsis txhob nco txog lawv tus kheej xwb, lawv yuav yeem ris kev txom nyem raws li Huab Tais Yes Xus, lawv tsis txhob ntshai plam txoj sia.
Kwv tij Hmoob sawv daws, Huab Tais Yes Xus tsis yog hais kom lawv txhob hlub lawv, tab sis Huab Tais Yes Xus xav kom lawv hlub ib zeej tsoom, lawv tsis txhob ua neeg qia dub. Zoo li thaum Huab Tais Yes Xus hais kom lawv muab lawv cov mov pub rau cov neeg tshaib noj.
Huab Tais Yes Xus hais kom lawv ris kev txom nyem, tsis yog txoj kev txom nyem tuaj ntawm kev tub nkeeg. Yog txoj kev txom nyem tuaj ntawm Tswv Ntuj tuaj kom tau pab luag lwm tus, xws li tus poj niam Kas Nas Has yeem raug Huab Tais Yes Xus hais cov lus piv nws li ib tug dev, nws ua tiag taij thov tsis tseg.
Huab Tais Yes Xus hais kom lawv raws nws mus yog kom lawv mloog lus thiab ua lub neej mus raws li Huab Tais Yes Xus tus piv txwv.
Huab Tais Yes Xus hais kom lawv txhb ntshai plam lawv txoj sia tab sis tsis yog kom lawv cia li lam cev txoj sia rau lwm tus txo, los yog lawv cia li rov txov lawv txoj sia. Huab Tais Yes Xus hais kom lawv txhob ntshai plam txoj sia rau txoj kev hlub luag tej, txoj kev pab cawm laug tej xws li Huab Tais Yes Xus tsis ntshai cov txwj laus muab nws tua, vim tias Huab Tais Yes Xus paub tias nws txoj kev tuag yuav cawm tau ntiaj teb neeg kom rov mus cuag tau Tswv Ntuj.
