ZAJ NYEEM HNUB TIM 12 LUB 7 HLI 2025
HNUB XYA, LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 24-33)
Kwv tij Hmoob, hnub no Huab Tais Yes Xus hais ob zaug txog lo lus tias ‘Nej txhob ntshai’ thiab hais ib zaug tias ‘Nej yuav ntshai’.
Huab Tais Yes Xus hais kom peb txhob ntshai dab tsi?
Yog txhob ntshai neeg, vim tias neeg tua tau peb lub cev xwb, lawv tua tsis tau peb tus plig. Tus peb yuav tsum ntshai, mas yog tus tua tau peb lub cev thiab tus plig.
Huab Tais Yes Xus hais cov lus no, mas yog nws hais los ntuas cov thwj tim nws yuav xa mus tshaj Ntuj lus. Huab Tais Yes Xus xav pab lawv ua siab loj, mas nws thiaj tab meeg hais rau lawv tias thaum lawv mus tshaj Ntuj lus, mas lawv yuav ntsib tej pab neeg tsis txais lawv los yog tsis mloog lawv, muaj tej tus kuj yuav tiv cov Hauv Paus Xa Lus xws li cov Fas Lis Xais thiab cov Xas Dus Kais. Thaum zoo li ntawd, cov thwj tim tsis txhob thim lawv txoj kev ntseeg txog Yes Xus, lawv tsum ua siab tawv lees rau zeej tsoom tias lawv paub Huab Tais Yes Xus, thiab yog Huab Tais Yes Xus xa lawv tuaj.
Cov thwj tim txhob ntshai luag tej cov lus hiam los cov hauj lwm phem, cov thwj tim tsuas tso siab rau Huab Tais Tswv Ntuj; yog Tswv Ntuj tsis pom zoo cia luag ua phem rau cov thwj tim mas lawv yuav ua tsis tau dab tsi rau cov thwj tim.
Tab sis yog tus thwj tim twg ntshai, nws tsis lees tias paub Huab Tais Yes Xus mas hais tau tias nws tsis hwm Huab Tais Yes Xus, nws ntshai luag lwm tus dua ntshai Huab Tais Yes Xus.
Thaum Huab Tais Yes Xus hais cov lus ntawd rau lawv, cov thwj tim tsis tau paub tias Huab Tais Yes Xus yog Tswv Ntuj; lawv tsuas paub tias lawv tus Xib Hwb yog ib tug ntshiab tuaj ntawm Tswv Ntuj tuaj xwb. Yog li mas thaum lawv tsis ntshai Huab Tais Yes Xus, mas yog lawv tsis ntshai Tswv Ntuj.
Kwv tij Hmoob sawv daws, niaj hnub no peb cov ntseeg txog Yes Xus, peb yog nws cov thwj tim, peb muaj ib txog hauj lwm yog pab tshaj Ntuj lus rau lwm tus, peb ua tim khawv txog lub Moo Zoo nyob hauv peb lub neej.
Li ntawd, Huab Tais Yes Xus cov lus no thiaj yog tab tom hais rau peb. Huab Tais Yes Xus hais kom niaj hnub mas peb txhob hais tias peb tsis paub Huab Tais Yes Xus. Peb yuav tsum ua pov thawj txog Huab Tais Yes Xus nyob hauv peb rau lwm tus pom, peb txhob muab Huab Tais Yes Xus zais cia.
Yog peb tsis lees tias peb paub Huab Tais Yes Xus, yog peb tsis kam zeem tseeb Huab Tais Yes Xus rau luag tej, yog peb tsis kam ua tim khawv txog Huab Tais Yes Xus nyob hauv peb lub neej thiab peb cov hauj lwm; mas yog peb tab tom tsis ntshai Tswv Ntuj, ces qhov kawg peb tus plig yuav mus rau cov hav hluav taws.
Huab Tais Yes Xus hais ntxiv tias “Tus tij yuav muab tus kwv muag rau luag tua, leej txiv yuav mus kom nws tus me nyuam rau luag, tej me nyuam yuav sawv tiv niam thiab txiv thiab yuav muab nkawd tua.”
Qhov no yog lub neej tsis txawj sib hwm, vim sawv daws tsis paub Tswv Ntuj. Yog peb tsis xav kom nyob hauv peb tsev neeg, hauv peb lub zos, hauv peb pab pawg, hauv peb cov Hmoob, mas peb yuav tau coj Huab Tais Yes Xus lub Moo Zoo mus kom txog sawv daws, qhia lawv kom paub txog Tswv Ntuj. Tswv Ntuj tsis yog ib tug niag siab phem nyiam muab txim rau cov neeg ua txhaum raws li Hmoob lub tswv yim xav. Tswv Ntuj yog tus muaj lub siab nyiam, siab mos, siab ntev rau cov neeg txhaum. Tswv Ntuj zoo siab zam rau cov neeg tau ua txhaum rau nws.
Yog tias peb xav kom peb cov Hmoob lub neej zoo tuaj, kom peb tsuas muaj kev sib nyiam sib hlub, kom nyob hauv peb muaj kev thaj yeeb nyob nyab xeeb, mas peb kav txij kub siab thiab ua tiag tshaj txog lub Moo Zoo.
Nyob zoo sawv daws.
