ZAJ NYEEM HNUB TIM 8 LUB 6 HLIS 2024
HNUB NCO TXOG MAB LIAB LUB SIAB HUV
COV LUS NYOB HAUV LUS KAS NTAWV MOO ZOO (LK 2: 24-51)
Kwv tij Hmoob sawv daws, hnub no lub Koom Txoos cia peb cov neeg ntseeg nco txog niam Mab Liab lub siab huv. Niam Mab Liab lub siab huv yog ib lub cim tsom txog tib neeg lub siab nyiam Tswv Ntuj tshaj puas tsav yam. Tus neeg nyiam Tswv Ntuj tas siab tas ntsws, tas tswv yim tas zog, thiab tas nws tus ntsuj plig; thiaj yeem mloog thiab ua raws li Tswv Ntuj hais yam tsis muaj chaw xyeej. Lub Moo Zoo hnub no hais tias thaum Mab Liab thiab Yos Xes nrhiav tsis pom nkawd tus me nyuam Yes Xus, mas nkawd txhawj tas nrho ces nkawd rov los nrhiav tus me nyuam pem Yes Lus Xas Les. Nkawd nrhiav tau 3 hnub thiaj ntsib tus me nyuam Yes Xus. Mab Liab hais rau tus me nyuam tias “Me tub, vim li cas koj ua li ntawd rau wb? Wb ntxhov siab tas nrho!”
Tus me nyuam hais rau leej niam tias “Vim li cas neb nrhiav kuv? Neb tsis paub tias kuv yuav leg kuv txiv cov hauj lwm lod?”
Mab Liab hnov tus me nyuam hais li ntawd, mas nws tsis yws tsis hais dab tsi ntxiv, nws tsuas khaws cov lus ntawd cia rau nruab siab xwb.
Lo lus tias ‘khaws cia rau nruab siab’ mas yog ‘khaws cov lus ntawd mus xav, mus ntuas, thiab txaug rau hauv siab’.
Mab Liab paub tias tus me nyuam Yes Xus yog Tswv Ntuj Leej Tub, ces nws mloog tus me nyuam cov lus thiab nws kuj ua raws li tus me nyuam cov lus. Nws tsis hais tias nws muab cai yog leej niam ces nws yuav tsa hwj chim loj dua Tswv Ntuj Leej Tub. Mab Liab kuj tsis qhia tej ntawd rau leej twg vim Tswv Ntuj tsis xav kom luag tej paub.
Vim Mab Liab lub siab huv, mas nws thiaj coj tus tus yam ntxwv li ntawd. Vim Mab Liab muaj lub siab huv, mas Tswv Ntuj txoj kev cawm thiaj poob los txog ntiaj teb neeg. Hnub no peb thiaj yuav nco txog niam Mab Liab lub siab huv thiab ua niam Mab Liab tsaug. Hnub no peb kuj yuav xyaum coj lub siab kom huv xws li niam Mab Liab mas peb thiaj yuav nyiam tau Tswv Ntuj thiab hlub lwm tus.
Kwv tij Hmoob, peb yog ib tug neeg me me lub zog tsis loj, yog li peb thiaj yuav vam txog niam Mab Liab tus tau mus nyob nrog nws Leej Tub lawd, kom nws pab thov Tswv Ntuj rau peb.
