ZAJ NYEEM HNUB TIM 7 LUB 6 HLI 2025
HNUB XYA, LIS PIAM 7 CAIJ HLA
COV LUS NYOB HAUV ZAM NTAWV MOO ZOO (Z 21: 20-25)
Kwv tij Hmoob sawv daws, peb ua lub caij Hla los xaus rau hnub no, tag kis mus peb yuav pib dua lwm lub caij; yog caij Nyob Nruab Xyoo. Nyob hauv lub caij Hla ntev li 50 hnub, peb tau mloog cov zaj Ntawv Moo Zoo hais txog Huab Tais Yes Xus kev nyiam, thiab txhib peb kom nyiam Huab Tais Yes Xus xws li Huab Tais Yes Xus tau nyiam tau hlub peb. Nag hmo lub Koom Txoos thiaj cev cov zaj Huab Tais Yes Xus nug peb tias “Koj puas nyiam kuv tiag.” Peb teb tias “Huab Tais, kuv nyiam koj tiag”, ces Huab Tais Yes Xus yuav pub ib txog hauj lwm rau peb thiab hais ntxiv rau peb tias “Koj raws kuv mus” xws li tau muab txoj kab xwm ua tus tswv zov yaj rau Pob Zeb thiab hais rau Pob Zeb.
Huab Tais Yes Xus qhia rau Pob Zeb tias nws lub neej lawm tom ntej mas yuav zoo li cas, ces Pob Zeb paub nws txoj hauj lwm thiab paub nws lub neej lawm, tshuav tus thwj tim uas Huab Tais Yes Xus nyiam mas tsis paub yuav zoo li cas, ces Pob Zeb txhawj txog nws, Pob Zeb thiaj nug saib yog li ne tus thwj tim ntawd yuav zoo li cas. Huab Tais Yes Xus hais li no rau Pob Zeb “Qhov ntawd tsis yog koj hauj lwm, ntawm koj mas koj raws kuv mus.”
Yog Huab Tais Yes Xus xav kom Pob Zeb txhob muab siab khuam rau dab tsi ntxiv, kav tsij rau siab ntso raws Huab Tais Yes Xus xwb vim Pob Zeb twb hais tias nws nyiam Huab Tais Yes Xus tiag.
Kwv tij, Huab Tais Yes Xus kuj hais li ntawd rau peb thiab, nws hais tias “Koj hais tias koj nyiam kuv tiag, mas hnub no mus koj kav tsij rau siab raws kuv, txhob ntxhov siab, txhob siab fab txog dab tsi ntxiv.” Ib yam li ob tug hluas sib sib nyiam, nkawd yeej yuav zoo siab sib qaws ua txij nkawm, nkawd yeej zoo siab tsim nkawd txoj kev tshiab txawm tias ib siab mas nkawd tseem muaj txhawj, los ntxhov siab txog niam txiv. Qhov no tsis yog kom nkawd tso niam txiv pov tseg.
Huab Tais Yes Xus kuj kom Pob Zeb zoo siab hlo lis nws cov hauj lwm raws Huab Tais Yes Xus mus, tab sis tsis tau kom Pob Zeb txhob tso tus thwj tim Huab Tais Yes Xus nyiam pov tseg. Tab sis yog tso yam khuam Pob Zeb siab pov tseg.
Kwv tij Hmoob, peb lub neej nyob hauv txoj kev ntseeg zoo li ntawd, peb txiav siab raws Huab Tais Yes Xus, peb tso peb kev ntxhov siab txog lwm tus rau Huab Tais Yes Xus ua tus nres, peb zoo siab lis cov hauj lwm Huab Tais Yes Xus txhib kom peb ua, ces peb rau siab thiab muab siab rau ua, tsis txhob xav ntau ntau, txhob muab yus piv rau luag tej tias ua cas kuv ua ntau, nws ua tsawg, ua cas kuv ua hnyav nws ua sib. Huab Tais Yes Xus yeej muab rau sawv daws raws li nyias rab peev xwm thiab nyias lub tswv yim.
