ZAJ NYEEM HNUB TIM 6 LUB 12 HLIS: HNUB NCO TXOG LEEJ NTSHIAB NIS KOS LAS.
COV LUS NYOB PHAU NTAWV HIS XAIS (HX 29: 17-24)
LUB MOO ZOO RAWS LI MAS TAIS (MT 9: 27-31)
Kwv tij Hmoob sawv daws, nyob hauv thawj zaj nyeem tus Yaj Saub His Xais xub tshaj tias muaj ib hnub mas cov lag ntseg yuav hnov lus, cov dig muag yuav pom kev, cov neeg me yuav zoo siab, cov pluag yuav dhia daj dhia luag.”
Hos cov lus hauv ntawv Moo Zoo kuj hais txog thaum Huab Tais Yes Xus kho 2 tus deeg dig muag kom rov pom kev.
Kwv tij, ob tug neeg no dig muag tab sis nkawd hnov lus thiab hais tau lus.
Nkawd dig muag ces nkawd ntsia tsis pom Huab Tais Yes Xus, tab sis nkawd hnov sawv daws cav txog Huab Tais Yes Xus tias muaj hwj huam kho tau neeg tej txiab mob, ces nkawd tos ntsoov hnub yuav tau ntsib Huab Tais Yes Xus. Thaum nkawd paub tias Huab Tais Yes Xus tuaj txog lawm, nkawd thiaj qw qw tias “Das Vis Leej Tub, thov koj khuv leej wb.”
Kwv tij, nkawd hu Huab Tais Yes Xus ua ‘Das Vis Leej Tub’ mas yog nkawd tab tom lees ntseeg tias Huab Tais Yes Xus yog Leej Pleev, yog tus Cawm Seej. Nkawd qhov muag dig tab sis nkawd lub tswv yim tsis dig.
Kwv tij, ob tug dig muag tsis yog lees tias nkawd ntseeg tias Huab Tais Yes Xus yog Leej Pleev xwb, nkawd tseem thov txoj kev khuv leej thiab. Nkawd hais tias “Thov koj khuv leej wb.”
Kwv tij, tsis muaj leej twg yuav khuv leej lwm tus tau, tsuas yog Tswv Ntuj xwb; vim tias kev khuv leej yog txoj kev hlub pub dawb rau lwm tus, tsis vam tias muaj ib hnub twg luag yuav pauj rov. Nyob hauv tib neeg mas ceeb laj muaj tus yuav pub txoj kev hlub dawb dawb rau lwm tus tau. Yog li peb thiaj hais tias tsuas muaj Tswv Ntuj xwb thiaj khuv leej tau lwm tus.
Thaum nkawd hais tias “Thov koj khuv leej wb”, mas yog nkawd ntseeg tias Huab Tais Yes Xus yog tus tuaj ntawm Tswv Ntuj tuaj tiag.
Huab Tais Yes Xus tsis kho nkawd qhov muag tam sid, nws tos ib me ntsis ces nws mam nug nkawd tias “Neb puas ntseeg tias kuv kho tau neb qhov muag?” Nkawd teb tias “Huab Tais, wb ntseeg.”
Kwv tij Hmoob, peb puas ntseeg li ob tug dig muag no? Peb puas ntseeg tias Huab Tais Yes Xus muaj hwj huam ua tau tas puas tsav yam?
Hnub no thiaj yog ib hnub zoo rau peb rov ua zoo nug peb tus kheej saib peb hais tias peb ntseeg tias Huab Tais Yes Xus yog Leej Pleev, yog Tswv Ntuj, mas peb puas ntseeg tias Huab Tais Yes Xus yog tus muaj hwj huam tiag. Los niaj hnub no peb tseem vam txog kev ua dab, kev saib hmoov saib yaig, ua neeb ua khawv koob, fiv yeem tej.
Kwv tij Hmoob, tsis muaj leej twg tsom tau nej lub siab lub tswv yim npaum li nej lawm. Kuj tsis muaj leej twg paub nej npaum li Huab Tais Tswv Ntuj.
Li ntawd, yog nej pom tias nej tseem vam txog lwm yam loj dua vam txog Huab Tais Tswv Ntuj, nej tseem tso siab rau lwm yam loj dua tso siab rau Huab Tais Tswv Ntuj, mas nej thov Huab Tais Tswv Ntuj tas zog kom tuaj pab nej hloov siab hloov tswv yim, kom nej tsuas ua tus neeg ntseeg txog Huab Tais Yes Xus xws li ob tug dig muag hauv hnub no. Nyob zoo sawv daws.
