ZAJ NYEEM HNUB TIM 5 LUB 8 HLI 2024
HNUB CEV LUB TUAM TSEV TEEV NTUJ XAAS TAS MAS LIAS MAS NTSIS OS LES
COV LUS NYOB HAUV MAS TAIS NTAWV MOO ZOO (MT 14: 13-21)
Kwv tij Hmoob sawv daws, nyob hauv lub Moo Zoo hnub no peb hnov hais tias Huab Tais Yes Xus pom tsoom sid coob mus ko taw raws nws qab, mas Huab Tais Yes Xus hlub lawv, ces Huab Tais Yes Xus kho lawv thiab muab cov thwj tim cov mov los pub rau tsoom sid tau noj.
Peb pom tias nyob hauv Huab Tais Yes Xus lub neej, nws muaj ib lub siab hlub cov neeg txom nyem. Qhov no yog ib yam peb tsoom neeg ntseeg sawv daws tsum muaj nyob hauv peb txhua leej txhua tus; muaj ib lub siab hlub lwm tus. Lo lus ‘hlub’ hauv hnub no tsis yog kev hlub xws li peb cov ua niam ua txiv hlub peb cov me nyuam, los yog cov me nyuam hlub tej niam txiv. Lo lus ‘hlub’ no kuj tsis yog xws li phooj ywg sib hlub los txiv neej poj niam sib hlub.
Lo lus ‘hlub’ hauv lub Moo Zoo hnub no yog txoj kev hlub thaum yus pom ib tug neeg raug txom nyem, ib tug neeg tos kev pab ntawm lwm tus; ces yus pab nrog nws tu siab, yus lub siab hlub nws. Piv li thaum peb pom ib tug me nyuam hnav khaub khaub hlab tsis muaj dab tsi noj, ua rau peb lub siab los kua muag, peb nrog hlub nws. Peb hais rau nws tias ‘me nyuad, ua cas koj ntxim hlub ua luaj no!’.
Lo lus ‘hlub’ hauv hnub no yog zoo li ntawd.
Thaum peb muaj lub siab hlub lwm tus li no mas peb thiaj khuv leej luag, ces peb ua cov hauj lwm kom tau nyiam tau hlub lawv. Ib yam li hnub no, Huab Tais Yes Xus pom tsoom sid txom nyem raws nws, mas nws hlub lawv ces nws thiaj kho lawv cov mob thiab pub mov rau lawv tau noj.
Kwv tij Hmoob, niaj hnub peb puas muaj lub siab hlub cov neeg peb tau ntsib hauv peb lub neej, peb puas khuv leej lawv, peb puas tau pab lawv.
Hnub no, nej hnov zaj Ntawv Moo Zoo lawm, peb xav kom nej hloov siab tshiab, nej muab Huab Tais Yes Xus lub siab hlub neeg los ua tsho hnav, nej ua Huab Tais Yes Xus txhais taw tawm mus ntsib cov neeg txom nyem, nej ua Huab Tais Yes Xus lub ncauj hais lo lus nplij neeg siab, nej ua Huab Tais Yes Xus txhais tes pab cawm lawv, nej qee yam nej muaj mus faib rau cov tsis muaj. Thaum nej ua li ntawd, nej tso siab rau Huab Tais Yes Xus, ces Huab Tais Yes Xus yuav ntxiv nej cov hauj lwm hlub luag kom ntsu tuaj.
