ZAJ NYEEM HNUB TIM 5 LUB 6 HLI 2026
HNUB NCO TXOG LEEJ NTSHIAB NPOS NIS FAS
COV LUS NYOB HAUV MAS KOS NTAWV MOO ZOO (MK 12: 35-37)
Kwv tij Hmoob, cov Yus Das hais tias Leej Pleev yog ib tus neeg hauv tus vaj Das Vis caj ces uas Tswv Ntuj yuav tsa los ua tus sau cov Yus Das rov los ua ib haiv neeg twj lij, nws yuav coj cov Yus Das mus nyob hauv txoj kev thaj yeeb, nws yuav yog tus rov txhim lub Tuam Tsev Teev Ntuj nyob Yes Lus Xas Les, nws yog tus vaj His Xas Lais tshiab. Yog li mas thaum Huab Tais Yes Xus nug cov Fas Lis Xais tias raws li lawv xav, Leej Pleev yog leej twg; cov Fas Lis Xais thiaj li teb tias Leej Pleev yog Das Vis tub.
Cov Yus Das ntseeg li ntawd, tab sis Huab Tais Yes Xus xav qhia ib qho tob tob ntxiv rau lawv, mas Huab Tais Yes Xus hais ntxiv rau cov tuaj mloog nws tias “Leej Ntuj Plig tshoj Das Vis kom hais cov lo no ‘Huab Tais hais rau kuv tus Huab Tais tias koj zaum ntawm kuv sab xis mus txog hnub kuv muab koj cov yeeb ncuab rau hauv qab xib taws.’
Das Vis lo lus no peb pom muaj lo tias ‘Huab Tais’ 2 qhov chaw. Qhov ua ntej yog Das Vis hais txog Huab Tais Leej Txiv los raws li cov Yus Das sau tias ‘Yas Ves’ uas yog Tswv Ntuj lub npe. Lo lus qom qab yog hais txog Huab Tais Leej Tub uas yog Leej Pleev.
Das Vis lees tias Leej Pleev yog nws tus Huab Tais. Thiab hais ntxiv tias Huab Tais Leej Txiv kom Leej Pleev zaum ntawm Huab Tais Leej Txiv sab xis. Lo lus no txhais tias ‘Leej Pleev koom nrog Huab Tais Leej Txiv txais Tswv Ntuj lub koob meej’.
Das Vis cov lus no qhia rau peb sawv daws tias Leej Pleev tsis yog ib tus neeg zoo li cov Yus Das ntseeg, tab sis Leej Pleev yog ib leeg Huab Tais koom nrog Huab Tais Leej Txiv ua ib tug Tswv Ntuj. Li ntawd, peb cov ntseeg txog Yes Xus, mas peb thiaj ntseeg tias Leej Pleev yog tseem tib neeg thiab yog tseem Tswv Ntuj. Leej Pleev yog Huab Tais Yes Xus, nws txhiv peb hauv kev ua txhaum qhev, nws npo peb dim ntawm dab phem txhais tes, nws cawm peb ntawm txoj kev tuag.
Peb ntseeg txog Huab Tais Yes Xus, peb tau lub neej twj lij, peb tau nyob kaj lug, peb txia ua Tswv Ntuj haiv neeg.
Nyob zoo sawv dawws.
