ZAJ NYEEM HNUB TIM 5 LUB 12 HLIS 2025
HNUB RAU, THAWJ LIS PIAM CAIJ TOS HUAB TAIS
COV LUS NYOB HAUV MAS TAIS NTAWV MOO ZOO (MT 9: 27-31)
Ob tug neeg dig muag ntawd, caum Huab Tais Yes Xus qab, thiab nkawd muaj kev tso siab tias, Huab Tais Yes Xus yog Mev Xias, los yog tus Vaj Pleev, uas muaj hwj huam yuav kho tau nkawd kom zoo tau.
Nkawd hu Huab Tais Yes Xus ua Das Vis Leej Tub. Qhov tseeb tiag Huab Tais Yes Xus kuj tsis tshua nyiam kom neeg hu Yes Xus li ntawd, tab sis yeej yog vim cov neeg tsis paub tias Huab Tais Yes Xus yog leej twg. Lub caij ntawd cov His Xas Lais yeej tos ntshis lawv tus vaj pleev uas yog Das Vis caj ces, yuav tuaj cawm haiv His Xas Lais, ces lawv ntseeg thiab tso siab tias Huab Tais Yes Xus yog tus Mev Xias, los yog tus vaj pleev uas lawv tos tos ntawd. Huab Tais Yes Xus yeej to taub txog zeej tsoom txoj kev xav, tiam sis, Huab Tais Yes Xus tsis yog tuaj raws li qhov lawv xav, nws tuaj raws li Leej Txiv uas xa nws tuaj lub siab nyiam, vim nws xav cawm ntiaj teb neeg kom tau txais kev dim.
Thaum ob tug dig muag raws Huab Tais Yes Xus los txog tom tsev, Yes Xus kuj nug tias “Nej ntseeg tias kuv muaj peev xwm kho tau nej qhov muag kom zoo hlo lod? Nkawd teb tias “Wb ntseeg,” ces Huab Tais Yes Xus thiaj teb rau nkawd tias, yog nej ntseeg li ntawd, ces thov kom muaj raws li nej txoj kev ntseeg.” Tam sim ntawd, nkawd ob lub qhov muag qhib plho, ces nkawd rov pom kev.
Cov phooj ywg sawv daws, lub caij no yog lub caij peb tos Huab Tais. Yog li ntawd, peb kuj xav caw nej los raws Huab Tais Yes Xus, txawm tias peb muaj txoj kev ntseeg me me li ob tug dig muag ntawd xwb, tsis kav Huab Tais yeej cawm tau peb, thov kom muaj kev tso siab rau Huab Tais Yes Xus, nyob rau hauv lub caij Huab Tais Yes Xus yug los no, nws rov qhib neeg ntiaj teb sawv daws qhov muag kom pom kev, kom peb txawj ntsia pom Huab Tais txoj kev zoo thiab txawj ntsia pom Huab Tais Tswv Ntuj txoj kev hlub neeg, kom ntiaj teb neeg sawv daws tau txais kev dim.
Nyob zoo sawv daws.
