ZAJ NYEEM HNUB TIM 5 LUB 10 HLI 2024
HNUB NCO TXOG LEEJ NTSHIAB FAUS TIS NAS
COV LUS NYOB HAUV LUS KAS NTAWV MOO ZOO (LK 10: 17-24)
Cov kws tij Hmoob, hnub no peb hnov Huab Tais Yes Xus ntuas cov thwj tim nws xa mus tshaj lub Moo Zoo tias “Nej tsis txhob zoo siab vim dab zwm rau nej. Nej yuav zoo siab vim nej lub npe muab sau cia saum ntuj lawm”, thiab Huab Tais Yes Xus tseem hais tias “Ob lub qhov muag uas pom tej yam nej pom no tau txoj hmoov zoo!”
Kwv tij, Huab Tais Yes Xus 2 nqe lus no peb yuav muab coj los nthuav zoo li no: Thaum peb ua tau ib yam dab tsi mas Huab Tais Yes Xus tsis xav kom peb muab coj mus qhuas tom tej, tab sis peb yuav nco tias muaj Tswv Ntuj ua tus pab, peb yuav zoo siab twj ywm hauv nruab siab. Los yog yuav muab hais tau tias thaum peb ua dab tsi mas txhob ua rau luag qhuas. Piv li thaum peb pom ib tug neeg twg ntsib kev txom nyem, peb pab nws mas yog vim qhov ntawd yog qhov peb yuav tsum ua, tsis yog vim xav kom luag qhuas tias peb yog ib tug neeg zoo.
Kwv tij Hmoob, tus neeg twg txawj ntsia pom li ntawd, mas nws txoj hmoov zoo.
Hnub no yog hnub nco txog Leej Niam Saw Mab Liab. Yog hnub peb sawv daws yuav hais saw Mab Liab ua ke. Vaj Qhia Fas Ntshis Kus hais tias thaum peb hais txoj saw Mab Liab mas yog peb tab tom hais lus rau niam Mab Liab kom nws pab coj peb lub siab mus npuab nws Leej Tub peb tus Huab Tais Yes Xus Pleev. Vim thaum peb hais txoj saw Mab Liab mas peb lub siab lub tswv yim yuav nco txog Huab Tais Yes Xus lub neej, nws kev cawm peb; mas peb yuav maj mam to taub thiab nkag siab txog Huab Tais Yes Xus kev nyiam peb. Thaum peb hais saw Mab Liab mas yog peb tab tom qhib siab rau Tswv Ntuj los pab peb tawm tsam lub qia dub hauv peb, kom peb muaj zog nrauj tau peb mas peb thiaj yuav qee tau peb pub rau lwm tus. Thaum peb hais saw Mab Liab, thiaj yog lub caij peb coj kev kaj lug tuaj tseb rau hauv peb lub siab lub plawv, tseb rau peb lub cuab, peb lub zos. Yog tas ntiaj teb neeg koom siab hais saw Mab Liab, mas peb thiaj yuav coj tau kev thaj yeeb tuaj cog kom tawg paj tau rau peb lub ntiaj teb no tau.
Kwv tij, peb ua Tswv Ntuj tsaug vim Tswv Ntuj tau qhib lub txiaj ntsim no rau cov me neeg hauv lub Koom Txoos, lawv thiaj coj tuaj qhia pub rau peb sawv daws, mas hnub no peb sawv daws thiaj yog tus tau txoj hmoov zoo.
