Zaj nyeem hnub tim 4 lub 3 hlis 2026
Hnub nco txog Leej Ntshiab Kas Xis Mis
Cov lus nyob hauv Mas Tais Ntawv Moo Zoo (MT 20: 17-28)
Kwv tij sawv daws, yog peb xav ua Tswv Ntuj ib tug tub txib peb yuav tsum zoo siab ua hauj lwm pab luag tej yam tsis muaj khib. Peb ua los ntawm peb lub siab nyiam thiab hlub luag tiag tiag, tsis yog lam ua vim muaj tus txib. Neeg ntiaj teb feeb coob xav ua tus nom, xav tau zoo noj tau zoo nyob, xav kom luag tiam yus, xav kom luag saib xyuas yus, tu yus. Tab sis hnub no peb tau hnov Huab Tais Yes Xus qhia nws cov thwj tim tias, leej twg xav ua tus thawj nws yuav tsum ua luag tus tub txib. Huab Tais Yes Xus qhia kom cov thwj tim paub txog lub luag hauj lwm ntawm kev ua tus coj tiag tiag. Uas yog yuav tsum ua luag tej tus tub txib, zoo yam li tus Yaj Saub Yes Les Mias, uas tab txawm raug luag thuam raug luag hiam, raug luag tsim txom npaum li cas, tsis kav, nws tseem coj ncaj rau nws lub luag hauj lwm tsis tseg, thiab tseem thov Ntuj pab txhab zog rau nws.
Huab Tais Yes Xus qhia tias, peb tsoom ntseeg yuav tsum coj tus yeeb yam zoo li no, mas peb thiaj tsim nyog ua Tswv Ntuj ib tug tub txib, peb thiaj tsim nyog ua tus loj nyob hauv Tswv Ntuj lub Ceeb Tsheej. Nyob zoo sawv daws.
