ZAJ NYEEM HNUB TIM 4 LUB 2 HLIS 2025
HNUB PEB LUB LIS PIAM 4 CAIJ NYOB NRUAB XYOO
HN 12: 1-4; MK 5: 21-43
Kwv tij Hmoob zoo nuiam, lub Moo Zoo hnub no peb yuav hnov hais txog 2 yam xwm; yam ib mas yog tus poj niam tsob ntshav ntseeg tias yog nws tau kov Huab Tais Yes Xus tw tsho mas nws yuav zoo, yam ob yog tus tswj tsev txoos Yais Los thov Huab Tais Yes Xus mus tsa tes cawm nws tus me ntxhais.
Ob zaj xwm no puav leej qhia rau peb tias Huab Tais Yes Xus yog peb txoj kev tso siab, Huab Tais Yes Xus yog peb txoj kev cawm, Huab Tais Yes Xus yog peb txoj kev ntseeg.
Tus poj niam tsob ntshav tso siab tias “Yog kuv tau kov Huab Tais Yes Xus tw tsho, mas kuv yuav zoo.” Yais Los tso siab tias “Yog kuv thov Huab Tais Yes Xus, mas nws yeej yuav mus pab kuv tus ntxhais kom zoo.”
Tus poj niam tsob ntshav, nws kov Huab Tais Yes Xus tw tsho ces nws zoo hlo. Yais Los txhos caug ntua thov, ces Huab Tais Yes Xus mus tom nws tsev thiab tsa nws tus me ntxhais sawv rov los.
Tus poj niam tsob ntshav thiab Yais Los; yog nkawd tsis ntseeg txog Huab Tais Yes Xus, mas nkawd yuav tsis tso siab rau Huab Tais Yes Xus, nkawd tsis yuav ua qhov nkawd tau ua kom nkawd tau txais kev cawm.
Huab Tais Yes Xus hais rau tus poj niam tsob ntshav tias “Phauj, koj lub siab ntseeg cawm koj lawm. Koj rov mus kaj siab lug, koj tus mob zoo lawm.”
Huab Tais Yes Xus hais rau Yais Los tias “Kov txhob ntshai, tsuav koj ntseeg xwb”, thiab hais rau tus me ntxhais tias “Me ntxhais, koj tsawv tsees.” Ces tus me ntxhais rov muaj txoj sia.
Kwv tij, Huab Tais Yes Xus xav kom peb ua zoo xws li tus poj niam tsob ntshav thiab Yais Los; yam li tso siab rau Huab Tais Yes Xus, saib Huab Tais Yes Xus yog tus cawm peb, ntseeg txog Huab Tais Yes Xus.
Huab Tais Yes Xus tseem xav kom peb ua zoo xws li nws thiab; yam li hlub cov neeg tuaj vam txog peb, pab cov neeg tuaj thov kev pab ntawm peb, thov Ntuj rau cov neeg txom nyem.
