ZAJ NYEEM HNUB TIM 4 LUB 1 HLIS: HNUB RAU THAWJ LUB LIS PIAM, CAIJ HUAB TAIS YUS LOS
COV LUS NYOB HAUV ZAM TSAB NTAWV, TSAB IB (1 Z 3: 7-10)
LUB MOO ZOO RAWS LI ZAM (Z 1: 35-42)
Kwv tij Hmoob sawv daws, nyob hauv tus Hauv Paus Xa Lus Zam tsab ntawv, nws hais tias “Tus coj txoj kev ncaj, mas nws lub siab ncaj ib yam li Leej Pleev. Tus ua txhaum, nws tuaj ntawm dab phem tuaj. Leej twg yug ntawm Tswv Ntuj los, mas nws tsis ua txhaum. Tus tsis ua raws txoj kev ncaj, nws tsis tuaj ntawm Tswv Ntuj tuaj.”
Zam cov lus no txhais tias tus nyob Huab Tais Tswv Ntuj tog mas nws ua qhov ncaj, tus tuaj dab phem tog mas nws ua qhov txhaum.
Zam xav qhia cov ntseeg sawv daws tias “Nej xaiv mas, saib nej xav tuaj tog twg? Nej xav ua Tswv Ntuj cov me nyuam los nej xav ua dab phem cov me nyuam? Nej xaiv saib nej yuav ua neeg zoo los ua neeg phem? Nej xaiv saib nej yuav ua qhov yog los nej ua qhov txhaum? Nej xaiv saib nej taug kev ncaj los nej tau kev nkhaus? Nej xaiv saib nej yuav nyiam luag tej los nej ntxub luag tej? Nej xaiv saib nej yuav Yes Xus ua nej tus Huab Tais Cawm Seej los nej yuav dab phem ua nej tus Huab Tais txov nej?”
Kwv tij, peb ua neej nyob mas peb muaj 2 txog kev rau xaiv li ntawd; ua zoo los ua phem. Niaj hnub lub keeb txhaum yeej hu kom peb ua txhaum, rub kom peb plam taw mus hauv lub qhov txhaum tsaus nti. Tab sis Huab Tais Tswv Ntuj hlub peb, niaj hnub Huab Tais Tswv Ntuj xa lub hnub tuaj tsom qhov pom kev ntiab qhov tsaus ntuj ua lub cim rau peb pom tias li cas los qhov pom kev yeej muaj zog dua qhov tsaus ntuj, qhov zoo yeej muaj yog dua qhov phem, Tswv Ntuj yeej loj dua dab phem. Li ntawd, txhua hnub peb thiaj yuav thov Ntuj, nyeem thiab mloog saib Huab Tais Tswv Ntuj qhia lub tswv yim dab tsi rau peb kom ntiab tau dab phem kev ntxias tawm mus.
Lub sij hawm peb tseem nyob hauv lub caij Huab Tais Yug Los, mas thiaj zoo rau peb txais Huab Tais Yes Xus yug los nyob hauv peb, kom Huab Tais Yes Xus ua lub hnub qub ci ntsa hauv peb lub siab tsaus ntuj nti, kom txhua hnub Huab Tais Yes Xus ua lub hnub kaj peb lub siab kom pom kev.
Peb muab xav saib, yog peb sawv ntawm ntug hoav txwv nyob hauv hmo ntuj tsaus tsis pom hnub qub thiab lub hli, mas peb ntsia tsis pom lub hiav txwv qhov zoo nkauj. Tab sis tag kis sawv ntxov lub hnub tawm plaws tig npoo ntuj mas lub hiav txwv zoo nkauj ntxim saib npaum li cas. Nyob hauv peb nruab siab kuj zoo li ntawd. Yog peb xav kom nyob hauv peb siab muaj kev zoo nkauj mas peb txais Huab Tais Yes Xus tuaj nyob hauv.
Peb yuav ua zoo li As Nres thiab nws tus npawg, thaum hnov tus Ntxuav Plig Zam tias “Neb ntsia, Tswv Ntuj tus yaj”, ces nkawd cia li raws Huab Tais Yes Xus mus kom pom thiab tau nrog Huab Tais Yes Xus tham.
Nkawd ntsib Huab Tais Yes Xus thiab tau nrog Huab Tais Yes Xus tham cesnkawd lub siab kaj tuaj. Nkawd tsis zais, nkawd hais rau lwm tus paub thiab coj lawv tuaj paub Huab Tais Yes Xus.
Tus ntseeg txog Huab Tais Yes Xus mas zoo li ntawd, nws txais kev zoo siab kev kaj siab ntawm Huab Tais Yes Xus, ces nws coj mus pub rau lwm tus.
Nyob zoo sawv daws.
