ZAJ NYEEM HNUB TIM 31 LUB 8 HLI 2024
HNUB XYA LUB LIS PIAM 21 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 25: 14-30)
Kwv tij Hmoob sawv daws, Huab Tais Yes Xus hais zaj paj lug cov nras nyiaj tus tswv muab rau cov tub txib coj mus ceev no; yog ib zag qhia peb sawv daws tias Huab Tais Tswv Ntuj ib txwm paub tias peb muaj tswv yim muaj peev xwm npaum cas, mas Huab Tais Tswv Ntuj kuj yuav pub nws txoj hauj lwm raws li peb yuav ua tau; ib yam li tus tswv tau muab nyiaj rau 3 tug tub txib tsis sib npaug, vim tus tswv yeej paub lawv zoo.
Tus muaj tswv yim thiab rab peev xwm ntau, mas nws tau txais lub luag hauj lwm ntau, tus muaj tsawg mas nws cov hauj lwm kuj yuav tsawg. Tab sis muaj 3 yam tus tswv nyiaj xav tau ntawm cov tub txib, kuj muaj 3 yam Huab Tais Tswv Ntuj xav tau ntawm peb thiab.
Yam li: 1) txoj kev nquag, 2) kev tso siab, thiab 3) kev ncaj ncees.
Tus tub txib nquag mas nws rau siab ntso coj tus tswv cov nyiaj mus ntxeev kom tau paj, nws tsis muab faus cia. Ib yam li peb Hmoob lub neej ua liaj ua teb, yog peb xav kom qoob loo ntsu mas peb tsum rau siab tu thiab nquag mus saib mus xyuas peb cov qoob tsis pub fab tsis pub lwj los yog muaj kab los ua npauj los txo. Muab piv rau txoj kev ntseeg mas Huab Tais Tswv Ntuj muab txoj hauj lwm rau peb, Huab Tais Tswv Ntuj yuav saib, saib peb puas nquag leg txoj hauj lwm ntawd kom txi txiv raws li peb lub tswv yim thiab rab peev xwm yuav ua tau.
Tus tub txib tso siab rau nws tus tswv tias thaum nws coj cov nras nyiaj mus ntxeev tau paj lawd, tus tswv yuav cia nws sab tej yam hauj lwm loj dua qhov qub. Ntawm peb los yeej yuav zoo li ntawd, peb tso siab tias yog peb nquag ua Tswv Ntuj cov hauj lwm tas nrho peb lub tswv yim thiab rab peev xwm lawm, Huab Tais Tswv Ntuj tsis tso peb pov tseg, nws yuav cia peb tau nyob hauv nws txoj kev zoo siab.
Tus tub txib muaj kev ncaj ncees mas nws nrhiav tau li cas, nws tsis zais, nws hais qhia rau tus tswv. Ntawm peb mas peb kuj yuav ua siab ncaj qhib lub siab tag nrho rau Huab Tais Tswv Ntuj ib yam nkaus.
Peb tsis txhob ua li tus tub txib tau txais ib nras nyiaj, nws ua zoo li yog tus neeg ncaj ncees, nws qhia ncaj rau tus tswv nyiaj tias tos nws tsis coj mus ceev yog vim dab tsi. Tab sis qhov tseeb vim nws tub nkeeg, nws tsis tso siab rau tus tswv tias txawm nws ua cov nyiaj poob tas los tus tswv yuav tsis muab txim dab tsi rau nws, nws feeb txoj hauj lwm rov rau nws tus tswv.
Peb yog ib tug neeg ntseeg, peb txhob muab Tswv Ntuj txoj hauj lwm zais cia, peb txhob thuam peb lub tswv yim thiab rab peev xwm Tswv Ntuj pub rau peb, peb txhob hais tias ‘Huab Tais Tswv Ntuj, kuv ua tsis tau, cia koj mam ua koj xwb mas tau lawm.’
