ZAJ NYEEM HNUB TIM 31 LUB 7 HLI 2024
HNUB NCO TXOG LEEJ NTSHIAB IS NYAS XYUS LOS YOS LAS
COV LUS NYOB HAUV MAS TAIS NTAWV MOO ZOO (MT 13: 44-46)
Kwv tij Hmoob sawv daws, hnub no peb lub Koom Txoos Kav Tos Liv nco txog ib tug Leej Ntshiab nto moo; yog Leej Ntshiab Is Nyas Xyus Los Yos Las. Thaum hluas, Los Yos Las xav tau suab npe mas nws mus ua tub rog. Nws raug phom ntawm ko taw mas lawv muab nws pob txha txiav ces nws ib txhais taw ntev thiab ib txhais luv, nws ua neeg ceg tawv.
Thaum Los Yos Las kho mob nyob hauv nws lub tsev, nws tau nyeem cov ntawv piav txog tsoom Leej Ntshiab lub neej, ua rau nws pom txog qhov tseeb tias yam muaj txiaj ntsim tshaj plaws rau tib neeg tsis yog suab npe tab sis yog Tswv Ntuj lub Ceeb Tsheej. Los Yos Las tso nws vaj tse tseg, nws mus nrhiav kev kawm saib yuav ua li cas thiaj tau Tswv Ntuj lub Ceeb Tsheej. Nws xyaum ua TxiV Twj Cuab, nws mus txog His Xas Lais teb, nws kawm cov txuj ua Leej Choj ces qhov kawg, Los Yos Las txais lub Cim Tiag Tes thiab tsa lub koom haum tshaj Ntuj Lus hu ua ‘Yes Xus Is’.
Kwv tij Hmoob, Leej Ntshiab Los Yos Las lub neej mus raws nraim li lub Moo Zoo peb hnov hauv hnub no. Tswv Ntuj lub Ceeb Tsheej yog lub cuab tam loj thiab muaj nqe tshaj plaws, tus twg pom lawm mas nws yuav muab nws cov cuab tam muag kom tau mus yuav Tswv Ntuj lub Ceeb Tsheej los ua nws tug.
Leej Ntshiab Los Yos Las mem tau Tswv Ntuj lub Ceeb Tsheej, mas nws tso vaj tse tseg, nws muab nws txoj sia ua tus nqe muas Tswv Ntuj lub Ceeb Tsheej. Niaj hnub no, Leej Ntshiab Los Yos Las thiaj tau nyob saum Tswv Ntuj lub Ceeb Tsheej, thiab nws lub koom haum tshaj Ntuj Lus ‘Yes Xus Is’ kuj ri mus thoob qab ntuj kom tau coj Tswv Ntuj lub Ceeb Tsheej mus txog plaub ceg kaum ntuj.
