ZAJ NYEEM HNUB TIM 31 LUB 12 HLIS: HNUB NCO TXOG LEEJ NTSHIAB VAJ QHIA XIS VES TAWS
COV LUS NYOB HAUV ZAM TSAB NTAWV, TSAB IB (1 Z 2: 18-21)
LUB MOO ZOO RAWS LI ZAM (Z 1: 1-8)
Kwv tij Hmoob sawv daws, thaum Yes Xus mus saum ntuj lawm, cov Hauv Paus Xa Lus tawm mus tshaj lub Moo Zoo, muaj cov neeg coob tig los ntseeg txog Yes Xus tab sis cov Hauv Paus Xa Lus raug ntes thiab tua tuag tas tsuas tshuav tus thwj tim Zam xwb thiaj tseem muaj txoj sia nyob. Thaum cov Hauv Paus Xa Lus tshaj lub Moo Zoo mas lawv piav txog Huab Tais Yes Xus lub neej thiab cov hauj lwm cawm neeg, ntev mus mas ib txhia muab txua dua tshiab, ib txhia muab qhia yuam kev tsis mus raws li qhov cov Hauv Paus Xa Lus tau ua tim khawv txog. Li ntawd, tus Hauv Paus Xa Lus Zam thiaj sau cov lus raws li nej hnov hauv hnub no mus ntuas cov Koom Txoos kom lawv ceev faj cov neeg qhia yuam kev. Zam hais tias “Kuv sau ntawv tuaj rau nej tsis yog vim nej tsis paub qhov tseeb. Kuv sau tuaj mas yog vim nej yeej paub qhov tseeb lawm. Nyob hauv qhov tseeb, tsis muaj ib yam dag.”
Qhov tseeb cov Hauv Paus Xa Lus tshaj rau sawv daws paub yog qhov tias Leej Lo Lus yog Tswv Ntuj. Ib puas tsav yam tshwm los vim Leej Lo Lus. Tswv Ntuj nyiam tib neeg mas thiaj xa Leej Lo Lus xeeb ua neeg; yog Yes Xus. Yes Xus yog Tswv Ntuj Leej Tub nqes los cawm lub qab ntuj neeg, tus ntseeg txog Yes Xus mas nws yog Tswv Ntuj cov me nyuam.
Cov qhia yuam kev mas lawv tsis qhia mus raws li no; yam li lawv qhia tias Yes Xus tsis yog Tswv Ntuj, Yes Xus tsis tuaj cawm lub qab ntuj neeg, Yes Xus tuag mus peb hnub mas tsis sawv rov los.
Nyob hauv qhov tseeb tsis muaj qhov dag, yam li nyob hauv qhov pom kev yeej tsis muaj qhov tsaus ntuj.
Kwv tij, muaj ib zaug Huab Tais Yes Xus hais tias Yes Xus yog qhov tseeb. Yog li nyob hauv Huab Tais Yes Xus thiaj tsis muaj qhov dag. Txhua yam Huab Tais Yes Xus hais puav leeg yog qhov tseeb.
Thaum peb ntseeg txog Yes Xus mas yog peb ua neej nyob hauv qhov tseeb, qhov pom kev. Tab sis vim peb yog neeg muaj txhaum mas ntau zaus peb lub siab pheej nyiam ib mus rau qhov dag qhov tsaus ntuj. Li ntawd, txhua hnub peb thiaj yuav thov Huab Tais Yes Xus nqa lub txiaj ntsim tuaj rau peb, ntxiv lub siab ntseeg rau peb tsis tseg.
Li ntawd, nyob hauv lub caij Yes Xus yug thiaj yog lub caij zoo rau peb txais Huab Tais Yes Xus tuaj nyob hauv peb, kom Huab Tais Yes Xus ua qhov pom kev coj peb mus taug txoj kev tseeb. Tsis tas li ntawd, hnub no tas lub ntiaj teb sawv daws muab ua hnub xaus lub xyoo 2024; ces sawv daws yuav muab lub qub neej pom nrog lub xyoo laus mus tag kis yuav plhis ua tus neeg tshiab coj tus cwj pwm thiab yam ntxwv kom zoo dua qhov qub. Hmoob nyiam hais tias xa vij sub vij xyw, suab quaj suab nyiav mus rau zaj qhov.
Hnub no kuv thiaj thov Huab Tais Tswv Ntuj pub lub txiaj ntsim rau nej cov mloog lub tshaj xo ZOO TSWV ZOV YAJ sawv daws, kom nej tso tau lub qub neej pom tseg nrog lub xyoo laus mus, tag kis peb lub xyoo tshiab ces nej ua tau tus neeg tshiab nyob hauv qhov tseeb.
