ZAJ NYEEM HNUB TIM 30 LUB 7 HLI 2024
HNUB NCO TXOG LEEJ NTSHIAB POB ZEB KHIS XOS LOS KUS
COV LUS NYOB HAUV MAS TAIS NTAWV MOO ZOO (MT 13: 36-43)
Kwv tij Hmoob sawv daws, hnub no nej hnov cov thwj tim txhib Huab Tais Yes Xus kom txhais zaj paj lug hais txog cov nroj thiab cov nplej. Zaj paj lug no hais tias muaj ib tug tswv teb tawm mus tseb noob nplej rau hauv nws daim teb tas, tsaus ntuj mas tus yeeb ncuab nyiag tuaj tseb cov noob nroj rau hauv nws daim teb nplej, ces muaj cov nroj tuaj xyaw cov nplej. Cov tub zog pom tias muaj nroj tuaj xyaw cov nplej, mas lawv mus hais rau tus tswv teb, saib puas kheev lawv muab cov nroj rho pov tseg. Tus tswv teb ntshai tsam lawv rho tau cov nplej, ces nws tsis kheev, nws yuav tos txog lub caij nplej siav tso, mam hlais cov nplej cia hauv txhab, thiab mam muab cov nroj sau mus hlawv.
Huab Tais Yes Xus txhais rau cov thwj tim tias tus tswv teb mas yog Tswv Ntuj, daim teb yog lub qab ntuj neeg, cov noob nplej yog cov neeg ua zoo, cov nroj yog cov neeg ua phem. Thaum txog lub caij kawg, mas Tswv Ntuj yuav xa nws cov Tshiab tuaj sau cov neeg zoo mus nyob saum Ntuj, hos cov neeg phem mas yuav raug pov mus hlawv hauv lub qhov hluav taws kub tsis txawj tuag.
Kwv tij Hmoob sawv daws, lub Moo Zoo hnub no zoo ntxiv tswv yim dab tsi rau peb?
Lub Moo Zoo xav qhia peb tias thaum peb xeeb los mas Tswv Ntuj tsim ib lub siab zoo nyiam Tswv Ntuj rau hauv peb tus ntsuj plig. Tswv Ntuj pub lub siab twj lij rau peb xaiv saib peb yuav yeem ua neeg zoo los ua neeg phem, ua Tswv Ntuj me nyuam los ua dab phem me nyuam. Tswv Ntuj pub lub sij hawm rau peb hloov siab tshiab mus txog hnub peb tso lub ntiaj teb tseg. Yog thaum ntawd, peb txawj ua tus neeg zoo mas peb yuav tau mus nyob saum Tswv Ntuj lub Ceeb Tsheej mus li. Yog peb xaiv ua dab phem cov me nyuam, mas peb lub qhov xaus kawg yog lub qhov hluav taws.
