ZAJ NYEEM HNUB TIM 30 LUB 6 HLI 2026
HNUB NCO TXOG COV TUAG UA TIM KHAWV HAUV TIAM IB NYOB HAUV LUB TSHEEJ LOS MAS
COV LUS NYOB HAUV MAS TAIS NTAWV MOO ZOO (MT 8: 23-27)
Kwv tij Hmoob, hnub no lub Koom Txoos nco txog cov tuag ua tim khawv hauv tiam 1 nyob hauv lub tsheej Los Mas. Thaum ntawd, yog xyoo 64 tus vaj Nes Los hlawv lub tsheej Los Mas, nws liam tias yog cov neeg ntseeg hlawv, ces tseem hwv thiaj li tuaj ntes cov neeg ntseeg mus tsim txom. Cov neeg ntseeg tsis kam thim kev ntseeg, lawv yeem tuag ua tim khawv txog lawv txoj kev ntseeg. Cov neeg ntseeg lub siab ntseeg ruaj nreb npaum no, ua rau ntau pua txhiab leej neem nyob Los Mas pom, ces lawv qhuas thiab xav yoog raws. Yog li txoj kev ntseeg thiaj tsis yaj ntshis ntawm lub tsheej Los Mas mus, los txog niaj hnub no.
Kwv tij, hnub no lub Moo Zoo piav txog thaum Huab Tais Yes Xus thiab cov thwj tim caij nkoj hla dej ntuj. Huab Tais Yes Xus tsaug zog, ces cua daj cua dub sawv loj los nplawm lub nkoj ua rau cov thwj tim ntshai, lawv thiaj li tsa Huab Tais Yes Xus kom sawv los cawm lawv. Huab Tais Yes Xus sawv, nws txwv cua thiab dej ntuj, mas dej ntuj thiaj mam rov tus yees.
Muaj ib lo lus Huab Tais Yes Xus hais rau cov thwj tim, mas yog Huab Tais Yes Xus hais tias “Vim li cas nej ntshai. Ua cas nej ntseeg me ua luaj?”
Huab Tais Yes Xus lo lus no kuj ntuas peb kom ua neej nyob, mas peb txhob ntshai dab tsi, tab sis kom peb ntseeg thiab cia siab rau Huab Tais Yes Xus thaum peb ntsib xwv txheej los yog raug teeb meem.
Cov kwv tij, nyob hauv peb lub neej mas zoo li lub nkoj nyob hauv plawv dej ntuj, peb nquag nquag raug teeb meem ib yam li dej ntuj ib sij nphau tuaj raug lub nkoj. Txhua zaus peb raug teeb meem, peb xav tias yuav ua li cas, tus kwv tij twg thiaj li yuav pab peb tau, peb tsis nco qab tias peb muaj Huab Tais Yes Xus nyob hauv peb lub neej. Txog thaum ti tes tiag tiag, daws tsis tau dab tsi li lawm, mas peb mam tig los vam khom Huab Tais Yes Xus, hu Tswv Ntuj pab.
Hnub no Huab Tais Yes Xus xav kom peb hloov lub tswv yim dua tshiab los nco txog Huab Tais Yes Xus ua ntej, muab peb cov teeb meem cev rau Huab Tais Yes Xus ua tus pab, mas peb mam ua lwm yam. Peb cia siab rau Huab Tais Yes Xus, peb ntseeg tias Huab Tais Yes Xus pab tau peb tiag, mas tab txawm teeb meem loj npaum cas, peb yeej yuav hla dhau.
Peb thov Ntuj ua ntej, peb mam mus hais plaub. Peb thov Ntuj ua ntej, peb mam nrog lwm tus tham teeb meem. Peb thov Ntuj ua ntej, peb mam vam txog luag pab peb. Ntseeg tau tias peb yeej yuav tau txais raws li peb lub siab ntseeg. Huab Tais Yes Xus pab peb, nws yuav hloov qhovhlob ua qhov yau, hloov qhov hnyav ua qhov sib, hloov nyuaj kom yooj yim tuaj.
Nyob zoo sawv daws.
