HNUB TIM 30 LUB 10 HLI; HNUB PLAUB LUB LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 13: 22-30)
Kwv tij Hmoob sawv daws, hnub no muaj ib tug neeg tuaj nug Huab Tais Yes Xus tias “Huab Tais, cov yuav txais kev cawm puas yog cov tsawg?” Huab Tais Yes Xus tsis teb dab tsi, nws tsuas hais tias “Nej ua tiag mus hauv lub qhov rooj nqaim mog.”
Kwv tij, tos Huab Tais Yes Xus hais li ntawd, vim tias nyob ntawm cov ntsa zeb yuav mus hauv lub tsheej Yes Lus Xas Les mas muaj ib cov qhov rooj nqaim nqaim cia cov neeg chaw mus hauv lub tsheej. Tus twg yuav chaws mus tau mas nws yuav tsum kwv nws cov nra mas lub qhov rooj thiaj txaus nws nkag tau mus hauv, ces Huab Tais Yes Xus thiaj muab lub qhov rooj nqaim no los piv rau txoj kev cawm. Tus twg yuav chaws mus hauv Tswv Ntuj lub Ceeb Tsheej mas nws yuav tau tso ntau yam pov tseg, nws tsuas nqa tej yam tseem ceeb nrog nws chaws mus hauv xwb, tus twg nqa ntau yam mas nws ceeb laj chaws tau mus hauv.
Kwv tij, txoj kev cawm yog zoo li ntawd.
Huab Tais Yes Xus hais ntxiv tias “Thaum tus tswv tsev sawv mus kaw qhov rooj lawm, nej cov tau nrog tus tswv noj haus ua ke thiab tau hnov tus tswv cov lus qhia, nej tseem nyob nraum zoov, nej khob qhov rooj thiab nej hu npaum cas, los tus tswv yuav tsis qhib qhov rooj rau nej. Tus tswv yuav hais rau nej tias ‘Nej cov ua tsis ncaj, nej txav mus deb kuv’.”
Kwv tij Hmoob sawv daws, Huab Tais Yes Xus cov lus no hais meej pem rau peb cov tau paub Huab Tais Yes Xus thiab tau niaj hnub mloog Huab Tais Yes Xus cov lus. Yog peb paub thiab hnov Huab Tais Yes Xus cov lus qhuab ntuas peb tas zog, tab sis peb tseem ua siab sib tsis maj seem ua raws, mas zoo li cov neeg hnov tus tswv lub suab hu los hauv tsev tab sis lawv tseem tham pem tuj tawv tom tej tshav puam, tsis maj chaws mus hauv tsev.
Txoj kev cawm yog zoo li ntawd.
Kwv tij, hnub no peb hnov Huab Tais Yes Xus hu peb lawm, peb yuav tau tso tej yam tsis tseem ceeb tseg, peb txhob ua siab sib tsis quav ntsej mloog Huab Tais Yes Xus cov lus caw peb; tsam ib pliag peb paub ces peb twb plam Tswv Ntuj txoj kev cawm lawm. Nej sawv daws nyob zoo.
