ZAJ NYEEM HNUB TIM 3 LUB 4 HLIS 2024
HNUB PLAUB LUB LIS PIAM HLA
COV LUS NYOB HAUV LUS KAS NTAWV MOO ZOO (LK 24: 13-35)
Kwv tij Hmoob sawv daws, Huab Tais Yes Xus cov thwj tim vam thiab tso siab tias Huab Tais Yes Xus yuav yog tus los txhiv cov His Xas Lais ntawm cov Los Mas txhais tes, yuav coj cov His Xas Lais mus ua ib haiv neeg twj lij. Tab sis hnub ua luag muab Huab Tais Yes Xus ntes tua saum Ntoo Cuam, mas cov thwj tim txoj kev vam yaj ntshis, txhua yam Huab Tais Yes Xus qhia thiab Ntawv sau txog, mas lawv tsis nco qab tas.
Hnub no Huab Tais Yes Xus thiaj rov hais tej ntawd rau nkawd kom ras tau tias lawv tus Xib Hwb yog Leej Pleev tus cawm qab ntuj neeg, yog tus Tswv Ntuj cog lus tias yuav xa los txhiv cov His Xas Lais tiag.
Kwv tij Hmoob, thaum nkawd hnov tej ntawd mas nkawd lub siab rov kub lug hauv nrog cev. Thaum nkawd paub tias tus hais lus rau nkawd yog Huab Tais Yes Xus tus sawv hauv qhov tuag rov los, mas nkawd zoo siab tas nrho. Nkawd sawv tsees tam sim ntawd, thiab mus hais qhia rau sawv daws paub.
Kwv tij Hmoob, thaum peb hnov Txiv Plig nthuav Tswv Ntuj Lo Lus, thaum Leej Ntuj Plig ua hauj lwm nyob hauv peb ua rau peb lub siab kub lug cuag hluav taws hlawv, mas peb puas maj zeeg tawm mus tshaj txog Huab Tais Yes Xus lub Moo Zoo rau lwm tus. Hnub no, Huab Tais Yes Xus xav kom peb ua tim khawv txog nws kev sawv rov los.
