ZAJ NYEEM HNUB TIM 29 LUB 9 HLI 2025
HNUB UA HMOOV PEB TUS TUAM TSHIAB
COV LUS NYOB HAUV ZAM NTAWV MOO ZOO (Z 1: 47-51)
Kwv tij sawv daws, Huab Tais Tswv Ntuj tsim ntuj tsim teb, thiab tsim ib puas yam tsav, nws tsim lub ntuj thiab tsim tib neeg, tsis tas li ntawd xwb, nws tseem tsim cov Tshiab kom tau tsob hwb nws. Nyob hauv Ntawv Ntshiab qhia peb tias Tswv Ntuj siv nws cov Tshiab xa xov rau tib neeg thiab los pab tib neeg. Tab sis nyob hauv chiv keeb lub hauv paus kev cawm neeg kuj qhia tias muaj ib txhia Tshiab tau tiv Tswv Ntuj los yog tawm tsam Tswv Ntuj. Cov Tshiab ntawd, chiv thawj lawv yog ib co Tshiab zoo nkauj, tiam sis thaum lawv tiv Tswv Ntuj ces lawv txia ua ib co dab phem lawm. Cov dab phem ntawd muaj hwj huam thiab muaj peev xwm dua neeg, lawv xav ntxias neeg kom tiv Tswv Ntuj, lawv ntxias neeg kom neeg txhob ua raws li Huab Tas Yes Xus qhia, kom neeg txhob tau txais kev cawm, li ntawd dab phem thiaj tuaj ntxias neeg lub siab kom ua txhaum rau Ntuj.
Huab Tais Yes Xus kuj tau qhia peb tias muaj dab phem ntxias neeg tiag, nyob rau hauv zaj peb txiv nyob saum ntuj uas peb niaj hnub hais, muaj nqe lus uas Huab Tais Yes Xus qhia peb thov Ntuj tias “Koj txhob tso peb raug kev ntxias, koj npo peb dim ntawm kev phem.” Li ntawd, peb yuav tsum kub siab thov Ntuj pab peb tsis tseg, mas peb thiaj yuav dim ntawm dab phem kev ntxias.
Nyob zoo sawv daws.
