ZAJ NYEEM HNUB TIM 29 LUB 7 HLI 2024
HNUB UA NCO TXOG LEEJ NTSHIAB MAS TAS, MAB LIAB, THIAB LAS NTXAS LOS
COV LUS NYOB HAUV ZAM NTAWV MOO ZOO (Z 11: 19-27)
Kwv tij Hmoob sawv daws, hnub no peb yuav nco txog peb nus muag hauv lub zos Npes Tas Nis, yog Las Ntxas Los, Mab Tas, thiab Mab Liab.
Lub Moo Zoo hnub no piav txog thaum Huab Tais Yes Xus hnov tias Las Ntxas Los tuag lawm, nws thiaj mus xyuas ob viv ncaus Mas Tas thiab Mab Liab tim Npes Tas Nis.
Mas Tas hais rau Huab Tais Yes Xus tias “Huab Tais, yog koj ntxov tuaj mas kuv tus nus Las Ntxas Los yuav tsis tuag.”
Huab Tais Yes Xus thiaj hais rau nws tias Las Ntxas Los yuav sawv rov los. Tab sis Mas Tas xav tias yog Huab Tais Yes Xus hais txog lub caij ntuj kawg, nws tus nus mam sawv rov los raws li cov Yus Das txoj kev ntseeg. Huab Tais Yes Xus thiaj xav paub tias Mas Tas puas ntseeg tias hnub no nws muaj peev xwm tsa tau Las Ntxas Los sawv, ces Huab Tais Yes Xus thiaj nug Mas Tas tias “Mas Tas, koj puas ntseeg tias kuv yog ‘Txoj Kev Sawv Rov Los’, thiab kuv yog ‘Txoj Sia’ mas?”
Mas Tas thiaj teb tias “Huab Tais, kuv yeej ib txwm ntseeg li koj hais tiag!”
Kwv tij Hmoob, lub Moo Zoo hnub no los xaus zoo li no, tab sis peb paub tias hnub ntawd, Huab Tais Yes Xus tau tsa Las Ntxas Los sawv hauv qhov tuag rov los tiag.
Kwv tij, Mas Tas muab siab npuab ntsoov Huab Tais Yes Xus, ces nws ntseeg cov lus Huab Tais Yes Xus hais, nws tau raws li lub siab ntshaw. Yog li peb yua ua zoo li cas, peb thiaj yuav npuab tau Huab Tais Yes Xus xws li Mas Tas?
Kawg yog ntseeg txog Yes Xus, nyiam Huab Tais Yes Xus tas siab tas ntsws, thiab hlub cov neeg nyob ib puag ncig peb.
Kwv tij, thaum peb ntseeg txog Yes Xus, mas peb yuav ua raws li Huab Tais Yes Xus cov lus qhia; thaum peb nyiam Huuab Tais Yes Xus tshaj tshua yam lawm, mas peb yuav niaj hnub nco txog Huab Tais Yes Xus mus li; thaum peb hlub lwm tus, mas peb yuav muaj kev vam khom nyob hauv peb vim tias luag tej kuj yuav hlub peb rov, ces peb yuav to taub tias Tswv Ntuj nyiam peb tas npauv.
