ZAJ NYEEM HNUB TIM 29 LUB 10 HLI 2025
HNUB PLAUB, LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 13: 22-30)
Hnub no Huab Tais Yes Xus qhia tias kev coj lub neej raws Huab Tais Yes Xus tsis yog yooj yim, lub siab nyiam Ntuj thiab txoj hauj lwm tshaj Ntuj lus, kev tsob hwb, thiab lub siab nyiam, yuav tshwm sim tseeb tuaj nyob rau hauv lub caij uas sawv daws tab tom qaug zog, thiab ntshai. Lo lus nug tias “Huab Tais cov uas yuav txais kev cawm puas yog cov tsawg?” Yog ib lo lus uas peb sawv daws yeej xav nug li ntawd. Tab sis, thov kom peb kev tso siab, vim Huab Tais yuav coj peb sawv daws rau hauv lub qhov rooj nqaim ntawd, uas sawv daws ntsia tsis pom thiab mus tsis txog. Huab Tais qhia qhov tseeb hauv txoj kev dim, lub qhov rooj nqaim tsis yog lub qhov rooj uas sawv daws nyiam mus, thiab tsis yog sawv daws yuav chaws mus tau, tiam sis, yog tus uas nws kub siab mloog Tswv Ntuj lub Moo Zoo thiab nws niaj hnub ua Tswv Ntuj txoj hauj lwm, thiaj yuav chaws mus tau rau hauv. Lub qhov rooj nqaim, tsis yog lub qhov rooj uas tshwj xeeb rau ib tug neeg twg.
Huab Tais Yes Xus hais tias “Cov ua ntej yuav tau ua qab, hos cov ua qab yuav tau ua ntej.” Tsis yog txoj hau kev rau cov neeg sib swm. “Peb tau nrog koj noj nrog koj nyob, peb tau hnov kom cov lus qhia tom tej tshav puam.” Tiam sis, yog ib txoj hau kev uas qhib dav rau ib zeej tsoom neeg sawv daws, uas lawv tig nrob qaum rau kev ua txhaum, hos lawv tig xub ntiag los nrhiav Huab Tais Tswv Ntuj, thiab tso siab rau Huab Tais Tswv Ntuj txoj kev nyiam kev hlub.
Kwv tij Hmoob sawv daws, thov kom peb kub siab mloog lub Moo Zoo thiab tshaj lub Moo Zoo rau ib zeej tsoom sawv daws, kom lawv tau hnov thiab paub txog peb tus Huab Tais Tswv Ntuj, peb yuav tsum tso kev ua txhaum tseg, peb tig los ua qhov zoo thiab nrhiav Huab Tais Tswv Ntuj, peb yuav nquag teev Ntuj thiab npuab Tswv Ntuj mus li, ces peb tso siab tias, peb yog cov chaws mus hauv lub qhov rooj nqaim lawm.
Nyob zoo sawv daws.
