HNUB TIM 29 LUB 10 HLI; HNUB PEB HAUV LUB LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 13: 10-17)
Kwv tij Hmoob, lub Moo Zoo hnub no piav tias thaum HUab Tais Yes Xus pom tus poj niam mob duav khoov nkoos, mas Huab Tais Yes Xus hlub nws, ces Huab Tais Yes Xus tsa tes raug saum nws thiab hais ib lo lus los kho nws kom rov zoo.
Nqe lus no zoo qhia peb sawv daws tias Huab Tais Yes Xus hlub peb txhua tus neeg, Huab Tais Yes Xus xav kom peb hlub txhua tus neeg txom nyem xws li Huab Tais Yes Xus tau hlub. Peb txhob tos tus neeg txom nyem taij thov tso peb mam nqes tes pab, peb pom tias pab tau ces peb kav tsij pab ntag.
Nqe lus no kuj zoo qhia peb tias thaum Huab Tais Tswv Ntuj pab peb txawm tias peb thov los tsis tau thov txog, mas peb yuav nco ntsoov cav txog Tswv Ntuj lub koob meej. Thaum muaj tus twg pab peb hauv kev txom nyem, peb kuj yuav nco ntsoov ua nws tsaug thiab ris nws lub txiaj ntsig.
Lub Moo Zoo piav ntxiv tias tus tswj lub tsev txoos pom Huab Tais Yes Xus kho tus poj niam mob duav hauv Hnub Xas Npas Tos, mas nws tsis txaus siab, vim cov Yus Das txoj cai txwv tsis pub ua hauj lwm Hnub Xas Npas Tos.
Kwv tij, Hnub Xas Npas Tos yog hnub twg?
Hnub Xas Npas Tos yog hnub cov Yus Das caiv tsis ua hauj lwm, lawv tshwj hnub ntawd rau cav txog Tswv Ntuj.
Nyob hauv Hmoob mas kuj muaj tej hnub caiv tsis pub ua hauj lwm los yog tsis pub tawm rooj, mas Hmoob yeej paub zoo tias thaum txog hnub caiv, cov laus yeej txwv tuag nthi tsis pub ua tej yam hla txoj cai.
Kwv tij, Huab Tais Yes Xus pom tus tswj lub tsev txoos tsis txaus siab thiab tsis to taub zoo txog Hnub Xas Npas Tos lub ntsiab, ces Huab Tais Yes Xus thiaj hais cov lus no tawm los tias “Hnub Xas Npas Tos, nej daws nej tus nyuj thiab tus luj ntawm lub dab zaub cab mus haus dej los tsis yog?”
Lo lus no txhais tias hnub caiv tsis pub ua hauj lwm tab sis ua cas sawv daws ho coj tus nyuj los tus luj mus haus tau dej, puas yog lawv pom tias kev khuv leej lawv cov tsiaj txhu loj dua tej kev caiv, puas yog lawv xav cia lawv cov tsiaj tau txais kev twj lij ib me ntsis nyob hauv hnub lawv hais tias lawv caiv.
Yog lawv twb ua tej yam me me li ntawd, tsim nyog lawv yuav ua tej yam loj dua ntawd nyob hauv hnub caiv thiab; yam li hlub thiab khuv leej cov neeg txom nyem.
Kwv tij Hmoob, peb txhob muab peb tej kev cai los khi peb kom tsis tau ua hauj lwm pab luag wm tus mog. Nyob zoo sawv daws.
