ZAJ NYEEM HNUB TIM 28 LUB 9 HLI 2024
HNUB UA HMOOV LEEJ NTSHIAB VES XES LAUS
COV LUS NYOB HAUV LUS KAS NTAWV MOO ZOO (LK 9: 43-45)
Cov kws tij Hmoob, Huab Tais Yes Xus qhia cov thwj tim ua zaum 2 tias nws yuav raug txom nyem. Huab Tais Yes Xus hais tias “Nej ua tib zoo khaws cov lus no rau hauv nej pob ntseg; Neeg Leej Tub yuav raug luag muab nws rau hauv tsoom neeg txhais tes.”
Kwv tij, Huab Tais Yes Xus hais nws cov lus no rau cov thwj tim mas yog tom qab sawv daws pom Huab Tais Yes Xus ua hwj huam kho tus me nyuam qaug dab peg. Thaum ntawd tas sawv daws tau pom cov hauj lwm Huab Tais Yes Xus ua, mas lawv paub lawm tias Huab Tais Yes Xus yog tus yuav sawv los cawm cov His Xas Lais tiag, lawv saib Huab Tais Yes Xus yog tus vaj yuav coj lawv dim ntawm cov Los Mas txhais tes.
Qhov no ua rau lawv lub siab loj thiab tawv tuaj, lawv yuav tsis ntshai cov tub rog Los Mas ntxiv lawm. Yog lawv raws Huab Tais Yes Xus, mas lwm hnub lawv yuav nto moo thiab lawv yuav ua neeg muaj hwj chim.
Huab Tais Yes Xus paub sawv daws lub siab, paub tias sawv daws xav zoo li ntawd, mas Huab Tais Yes Xus thiaj xav ntuas sawv daws kom rov nco tias nws tsis yog tus vaj coj sawv daws mus ntaus rog, nws tsis yog tus yuav nqa lub koob meej tuaj rau cov neeg raws nws. Nws tsuas yog tus los ua sawv daws tus tub txib, los ua tus txhiv sawv daws hauv lawv cov txhaum, thiab yuav txais kev tuag zoo li tus neeg tsis muaj hwj chim.
Huab Tais Yes Xus thiaj hais tias “Nej ua tib zoo khaws cov lus no rau hauv nej pob ntseg.”
Kwv tij, muaj ntau zaus Huab Tais Yes Xus hais lus rau peb, tab sis vim Huab Tais Yes Xus cov lus tsis mus raws li peb lub siab ntshaw, tsis zoo li qhov peb xav, mas thiaj zoo li muaj ib yam dab tsi ntis kom peb txhob to taub Huab Tais Yes Xus cov lus lub ntsiab. Muaj ntau zaus peb ua tus neeg muab hlob tsa peb cai loj dua luag, mas peb thiaj tsis liam fab rau mloog Huab Tais Yes Xus cov lus tawm hauv ib tug neeg twg lub ncauj los.
Hnub no peb yuav thov Tswv Ntuj pab rhuav lub tswv yim, rhuav lub siab muab hlob tawm hauv peb mus, peb thiaj yuav mloog tau Huab Tais Yes Xus cov lus, peb thiaj yuav to taub Huab Tais Yes Xus cov lus lub ntsiab.
