ZAJ NYEEM HNUB TIM 28 LUB 2 HLIS 2025
HNUB RAU, LUB LIS PIAM 7 CAIJ NYOB NRUAB XYOO
NXL 6: 5-17; MK 10: 1-12
Kwv tij Hmoob, ua cas cov Fas Lis Xais xav sim Huab Tais Yes Xus? Vim lawv pom muaj neeg coob raws Huab Tais Yes Xus ces lawv xav paub tias Huab Tais Yes Xus puas yuav paub thiab to taub txog Txoj Cai zoo los yog Huab Tais Yes Xus lam zev tej zaj tswv yim tuaj qhia tsoom sid xwb. Lawv pib nug tias “Ib tug txiv neej yuav nrauj nws poj niam puas tau?”
Kwv tij, tsis yog cov Fas Lis Xais tsis paub, lawv paub zoo kawg vim lawv yog cov coj Txoj Cai nruj thiab tuav raws Txoj Cai cia, tab sis ib yam li tau hais; lawv xav paub tias Huab Tais Yes Xus puas paub tiag.
Huab Tais Yes Xus yeej paub tias lawv nug no yog lawv xav sim nws xwb, ces Huab Tais Yes Xus tsis teb tam sid, nws nug lawv rov qab tias “Mais Xes qhia dab tsi rau nej mas?”
Huab Tais Yes Xus hais txog Mais Xes vim cov Fas Lis Xais saib Mais Xes tam li yog lawv tus yawg koob, mas lawv hwm Mais Xes heev. Lo lus no thiaj zoo li Huab Tais Yes Xus tab meeg nug lawv tias “Nej tus yawg koob qhia nej li cas?” Cov Fas Lis Xais thiaj tias “Mais Xes kom ua ntawv nrauj tso thiaj nrauj tau.”
Kwv tij Hmoob, qhov tiag mas Mais Xes tsis pub kom cov His Xas Lais sib nrauj, tab sis vim cov His Xas Lais thaum lawv tsis xav nrog lawv tus poj niam ua neej mus ntxiv mas lawv ua phem phem rau tus poj niam kom tau muab tus poj niam nrauj, ces Mais Xes hlub cov poj niam dhau nws thiaj kheev cia lawv ua ntawv nrauj kom tau poj niam txhob poob ua tus txiv li cuab tam ntxiv. Yog tus txiv neej twg hlub tus poj nrauj nws xav pab tus poj nrauj los thiaj tsis txhaum rau txoj cai tias nws nyiag luag tej li cuab tam. Qhov Mais Xes kom ua ntawv nrauj tso mam sib nrauj mas yog qhov no, tsis yog pom zoo cia txiv neej nrauj poj niam.
Li ntawd, Huab Tais Yes Xus thiaj hais rau cov Fas Lis Xais tuaj nug tias “Yog vim nej lub siab txhav dhau, Mais Xes thiaj sau tias tus twg yuav nrauj nws poj niam mas tsum ua ntawv nrauj tso.”
Huab Tais Yes Xus hais ntxiv txog yam cov His Xas Lais ib txwm paub thiab ib txwm ntseeg los tias “Nej yeej paub tias thaum chiv lub keeb mas Tswv Ntuj tsim tus txiv neej thiab tus poj niam. Tswv Ntuj yeej hais tias tus txiv neej yuav tso nws niam nws txiv tseg mus npuab tus poj niam, ces nkawd yuav ua ib lub cev nqaij xwb.” Huab Tais Yes Xus kuj xaus lo lus no tias “Yog vim qhov no mas yam Tswv Ntuj muab sau los ua ke, neeg yuav tsis txhob muab cais.”
Kwv tij, cov Fas Lis Xais hnov li no mas lawv hais dab tsi ntxiv tsis tau, vim Mais Xes yeej qhia li ntawd tiag.
Kwv tij Hmoob sawv daws, peb muab piv rau peb lub neej zim txwv no tsis hais kev txij nkawm los lwm yam mas peb pom tias muaj ntau ntau zaus peb twg yog tus txhaum tab sis peb tsis xav poob ntsej muag, ces peb ua yam ub yam no kom luag pom tias peb xwb thiaj yog tus raug, yog tus neeg ncaj hos tus muaj teeb meem nrog peb mas nws yog tus txhaum, yog tus tsis zoo. Ib yam li cov txiv neeg His Xas Lais thaud uas lawv tsis xav yuav lawv tus poj niam ntxiv ces lawv ua txhua yam kom tau nrauj lawv tus poj niam, lawv tsis nco pom tias tus poj niam tawm ntawm lawv tus tav los, yog lawv cev nqaij; lawv saib tus poj niam zoo li cuab tam los zoo li lub twj, xav yuav ces yuav yog tsis xav yuav ces ua ntia pov tseg. Lawv saib lawv xwb thiaj muaj tsim, lawv saib lawv xwb thiaj yog tus ncaj, lawv saib lawv xwb thiaj yog tus yog.
Peb tsis txhob ua li ntawd mog.
