HNUB TIM 28 LUB 10 HLI; HNUB UA HMOOV LEEJ NTSHIAB XIS MOOS THIAB YUS DAS
COV LUS NYOB HAUV LUS KAS NTAWV MOO ZOO (LK 6: 12-19)
Kwv tij Hmoob, nyob hauv 12 tug thwj tim ua Hauv Paus Xa Lus mas muaj npe li no: Xis Moos Pob Zeb, As Nres, Yas Kos, Zam, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fas Yos tus tub, Xis Moos tus siab kub, Yus Das uas yog Yas Kos tus tub, thiab Yus Das Kas Lis Yaus.
Txhua xyoo mas lub Koom Txoos yuav tshwj tej hnub cia ua hmoov cav txog 12 tug Hauv Paus Xa Lus no; hnub no yog ua hmoov cav txog tus Hauv Paus Xa Lus Xis Moos siab kub thiab Yus Das uas yog Yas Kos tus tub.
Raws li cov neeg ntseeg ib txwm hais mas nkawd ob tug no tau mus tshaj lub Moo Zoo rau Pes Xis teb ces nkawd raug tua tuag ua tim khawv nyob hauv lub teb chaws.
Kwv tij Hmoob, hnub no lub Koom Txoos cev lub Moo Zoo ntu hais txog Huab Tais Yes Xus xaiv 12 tug thwj tim ua Hauv Paus Xa Lus. Lo lus ‘Hauv Paus Xa Lus’ ntxeev los ntawm lo lus tias ‘Apostolus’ los yog ‘Apostle’ txhais tias ‘tus raug xa mus’.
Cov Hauv Paus Xa Lus raug xa mus ua dab tsi?
Lawv raug xa mus tshaj txog Tswv Ntuj lub Ceeb Tsheej. Lub zim txwv no peb hais tias ‘cov tub tshaj Ntuj Lus’, lawv yog cov uas lub Koom Txoos xa mus ua pov thawj txog Huab Tais Yes Xus lub neej, kev tuag thiab sawv rov los.
Kwv tij, ua ntej Huab Tais Yes Xus yuav xaiv cov Hauv Paus Xa Lus, nws nce mus ‘teev Ntuj’ pem roob. Lus Kas sau tias Huab Tais Yes Xus teev Tswv Ntuj ib hmos.
Peb cov neeg ntseeg hauv lub Koom Txoos Kav Tos Liv siv lo lus ‘teev’ los hais txog lo lus Aas Kiv tias ‘Pray’ txhais tias ‘nrog sib tham’; yam li ‘teev Tswv Ntuj’ yog nrog Tswv Ntuj sib tham, ‘teev Yes Xus’ yog nrog Huab Tais Yes Xus tham, ‘teev niam Mab Liab’ yog nrog niam Mab Liab tham. Tab sis peb xav kom lo lus ‘teev’ no txawv lub ntsiab hauv txoj kev cai dab qhuas, ces peb thiaj hais tias ‘teev Ntuj’.
Kwv tij Hmoob, peb yuav teev Ntuj thaum twg?
Peb teev Ntuj thaum peb xav tau kev pab ntawm Huab Tais Tswv Ntuj, peb teev Ntuj thaum peb xav ua Tswv Ntuj tsaug, peb teev Ntuj thaum peb xav cav txog Tswv Ntuj lub hwj chim loj tas nrho, peb teev Ntuj thaum peb xav npuab Tswv Ntuj, xav cev peb los yog lwm tus neeg rau Tswv Ntuj ua tus pov hwm.
Kev teev Ntuj mas peb yuav teev lub sij hawm twg yeej tau, tsuav yog peb nyob ntsiag ntsiag, tswm xeeb thiab hais lus rau Tswv Ntuj. Li ntawd, hnub no Leej Ntshiab Lus Kas thiaj sau piav tias ‘Yes Xus mus pem roob, nws teev Ntuj ib hmos’.
Vam tias txhua hnub, peb yuav nrhiav ib lub zoo sij hawm nyob nrog Tswv Ntuj thiab nrog Tswv Ntuj tham yam ntsiag ntsiag mog. Nyob zoo sawv daws.
