ZAJ NYEEM HNUB TIM 27 LUB 8 HLI 2024
HNUB NCO TXOG LEEJ NTSHIAB MOS NIS KAS
COV LUS NYOB HAUV MAS TAIS NTAWV MOO ZOO (MT 23: 23-26)
Kwv tij Hmoob sawv daws, lub Moo Zoo hnub no txuas zaj nag hmo; yog Huab Tais Yes Xus cov lus tsawm cov Kws Ntawv Ntshiab thiab cov Fas Lis Xais. Nag hmo peb twb paub lawm tias ua cas Huab Tais Yes Xus thiaj li tsawm lawv. Hnub no peb yuav los saib, saib Huab Tais Yes Xus ntuas lawv li cas.
Huab Tais Yes Xus hais tias cov Kws Ntawv Ntshiab thiab cov Fas Lis Xais qee ib feem kaum ntawm tej lawv muaj rau Tswv Ntuj raws Txoj Cai tab sis ua cas lawv tsis paub cev ‘kev ncaj’, ‘kev hlub luag’, ‘kev ntseeg’ ua cov txim rau Tswv Ntuj.
Tos Huab Tais Yes Xus hais li ntawd, vim 3 yam no thiaj yog xam xis Tswv Ntuj siab. 3 yam no thiaj ntxuav tau neeg lub siab kom huv tuaj.
Kwv tij, cov Yus Das hais tias thaum koj qee ib feem kaum ntawm qhov koj muaj rau Tswv Ntuj mas txhais tias koj yog tus neeg ntseeg txog Tswv Ntuj zoo, Txoj Cai hais li ntawd. Tab sis Tswv Ntuj tsis saib li ntawd, Tswv Ntuj saib hauv neeg nruab siab, Tswv Ntuj saib hauv qhov zais ntshis lwm tus ntsia tsis pom.
Tus neeg qee qhov nws muaj rau lwm tus raws li Txoj Cai txiav, tsis yog vim nws lub siab hlub luag tej mas nws tau koob haum dab tsi? Yog kawg, nws tau suab npe, tau ntsej muag, tau lus qhuas. Tab sis nyob ntawm Tswv Ntuj xub ntiag mas nws tsis tau koob haum dab tsi.
Kwv tij Hmoob, niaj hnub no thaum peb mus teev Ntuj, peb tso nyiaj rau hauv lub hnab nyiaj, peb pab ua ib txog hauj lwm dab tsi kuj xij. Nej muab xav saib puas yog peb ua vim txoj cai los zej zog hais kom ua, los peb ua vim peb saib txoj kev ncaj, txoj kev hlub luag, txoj kev ntseeg ua qhov loj.
peb niaj lis piam mus teev Ntuj vim peb ntseeg thiab tso siab rau Tswv Ntuj ces peb mus ua Tswv Ntuj tsaug, mus txais Tswv Ntuj Lo Lus los yug peb txoj sia; los peb mus teev Ntuj vim peb ua raws li txoj kab xwm ib tug neeg ntseeg yuav tsum ua.
Peb tso nyiaj hauv lub hnab vim peb xav pab txhawb lub tsev teev Ntuj, los yog vim peb pom luag tej tso ces peb tso raws.
Peb nqa qoob loo mus txi Ntuj, peb xaiv cov zoo tshaj los peb cev tej yam seem ua peb cov txim txi rau Ntuj.
Thaum peb thov Ntuj, peb puas tsa lub siab kom mus nyob ze Tswv Ntuj, los peb lam thov kom tas lus.
Thaum muaj ib tug neeg ntsib xwv txheej, peb mus pab nws vim peb lub siab hlub nws, los yog peb mus vim zej zog hu kom sawv daws mus sib pab.
Nej khaws coj mus xav mog.
