Hnub tim 27 lub 3 hlis 2025
Hnub Tsib, Lis piam 3 caij Plaub Caug.
LK 11: 14-23
Kwv tij Hmoob sawv daws, Huab Tais Yes Xus ua cov hauj lwm pab cawm cov neeg raug dab, cov muaj mob, cov txom nyem mas muaj neeg pib raws nws coob ua rau ib txhia tsis txaus siab. Cov ntawd lawv hais lus xaiv lus dag tias yog Huab Tais Yes Xus vam txog dab los ntiab dab. Lawv hais li ntawd kom tau ntxias tsoom sid tsis txhob mus raws Huab Tais Yes Xus, tsis kav Huab Tais Yes Xus tsis ntaus siab me; nws paub ntsoov tias nws txoj hauj lwm yog pab sawv daws dim kev txom nyem, ces Huab Tais Yes Xus tab meeg ua ntxiv mus thiab hais tej lo lus kom cov tuaj mloog lawv coj mus xav.
Hnub no lub Moo Zoo xav qhia li no rau peb; yam li yog peb txiav siab ua tej yam hauj lwm zoo rau luag lawm, tab txawm muaj neeg thuam los hais tsis zoo rau peb, los peb raug hiam raug tsim txom, mas peb txhob ntaus siab me tso tes tseg. Peb muab ua tib zoo xav saib peb puas ua li hais los no. Nyob zoo.
