ZAJ NYEEM HNUB TIM 26 LUB 10 HLI 2024
HNUB XYA LUB LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 13: 1-9)
Cov kws tij Hmoob, peb ua neej nyob mas muaj ntau zaus peb raug xwv txheej los peb ntsib teeb meem ntau dua lwm tus, mas peb nyiam nyiam yws tias puas yog vim peb tsis zoo, los puas yog vim peb yog neeg muaj txhaum ces peb lub neej thiaj tsis zoo xws li luag tej; peb hais tias ua cas pheej yuav yog peb xwb.
Kwv tij, yog thaum peb raug xwv txheej, peb tsuas niaj zaus yws li ntawd mas puas yuav muaj dab tsi zoo dua tuaj. Yeej tsis muaj.
Peb ua ib cim qoob los ua lag luam poob peev tas, peb yws tias ua cas kuv yuav tsis muaj hmoo, ua dab tsi los tsis nce tes. Peb hais li no puas yuav pab tau dab tsi. Yeej pab tsis tau.
Nyob hauv lub neej ua neeg ntseeg los ib yam, yog peb tsis hloov siab ces peb yeej tsis tau txais kev cawm.
Huab Tais Yes Xus hais zaj paj lug txog tsob txiv ncuav pias tsis txi txiv, mas yog piv tau rau peb lub neej ua neeg ntseeg. Peb ua ib tug neeg ntseeg tab sis yog peb txoj kev ntseeg tsis txi txiv mas tsis muaj qab hau dab tsi, muaj ib hnub peb yuav raug rhuav tawm mus.
Tus tub txib zov lub vaj hais tias “Huab Tais, thov koj cia tsob ntoo nyob xyoo no ntxiv, kuv yuav nphoo chiv rau. Tej zaum yav tom ntej tsob ntoo yuav txi txiv. Yog tsis txi koj mam muab ntov.”
Kwv tij, peb yuav ua li ntawd, thaum tseem muaj lub sij hawm mas peb kav tsij hloov siab tshiab, hloov peb tus cwj pwm thiab hloov peb lub tswv yim kom mus raws li lub Moo Zoo, mas peb txoj kev ntseeg thiaj yuav txi tau txiv.
Peb yuav pib thaum twg, puas cia tag kis los nag kis, hli tom ntej los xyoo tshiab no. Tsis yog li ntawd.
Peb yuav tau pib ziag no, lub sij hawm no ntag, vim tias peb tsis paub hnub twg Huab Tais Tswv Ntuj yuav hu peb mus cuag nws.
