ZAJ NYEEM HNUB TIM 25 LUB 10 HLI 2024
HNUB RAU LUB LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 54-59)
Cov kwv tij Hmoob, lub teb chaws His Xas Lais sab hnub poob yog lub hiav txwv Mes Dis Tes Las Nes, sab qab teb yog hav suab puam Xis Nais. Yog li mas thaum cua tshuab sab hnub poob tuaj mas cua yuav nqa cov pa dej sawv hauv hiav txwv Mes Dis Tes Las Nes tuaj, cov pa ntawd yuav sawv ua huab nqa nag tuaj ywg lub teb chaws. Yog cua tshuab sab qab teb tuaj mas yuav pus cov cua sov hauv hav suab puam tuaj thiab, ces huab cua yuav kub heev. Cov Yus Das lawv nyob ib txwm hauv lub teb chaws ces lawv ntsua tau lub ntuj lub teb li no.
Lub Moo Zoo hnub no Huab Tais Yes Xus thiaj muab qhov no los hais ua piv txwv qhia lawv. Huab Tais Yes Xus hais tias “Nej ntsuas tau lub ntuj lub teb tus yam ntxwv, ua cas nej ntsuas tsis tau lub zim txwv no tej xwm?”
Kwv tij Hmoob, peb tsis paub tias Huab Tais Yes Xus hais cov lus no thaum twg, puas yog thaum cov Fas Lis Xais thov ib lub cim, los puas yog thaum lawv muab txim rau ib tus neeg, los puas yog thaum tus neeg tuaj taij Huab Tais Yes Xus ua tus faib cuab tam rau nws thiab nws tus tij.
Lus Kas sau tias Huab Tais Yes Xus hais cov lus saud tas, nws hais ntxiv tias “Yog koj nrog tus ntxub koj mus cuag nom, mas thaum koj tseem txog ib tog kev, koj yuav ua tib zoo nrog nws hais kom haum. Tsam nws coj koj mus rau tus nom txiav txim, ces tus nom muab koj cob nkaus rau tub ceev xwm.”
Kwv tij Hmoob, peb ua neej nyob mas peb yeej mem tau tias tus neeg twg coj tus cwj pwm zoo li cas, tus neeg twg lub siab zoo los phem. Yog vim li ntawd, niaj hnub peb ua neej nyob mas peb thiaj yuav tsum paub saib neeg, peb yuav tsum paub tias nrog tus neeg twg thiaj yuav tsis muaj plaub muaj ntug, peb yuav tsum paub tias yuav ua li cas thiaj tsis muaj xaiv muaj lus nrog cov nyob ib puag ncig peb.
Piv li nyob hauv luab cuab, yog tus niam pom tus txiv nyob nplhu dub nciab mas tus neeg yuav paub tias yog hais lus ntau mas ib ntsis yuav muaj lus, ces tus niam ua twj ywm. Tus txiv mus tsham phooj tsham ywg tsis pab nrog zov me nyuam tu vaj tse, ces los txog ntsib tus niam yws yws los nws yuav tau ua twj ywm, txhob cav txhob hais lus dab tsi ntau. Nkawd ua li ntawd ces nkawd lub neej thiaj nyob tau sib haum.
