ZAJ NYEEM HNUB TIM 24 LUB 8 HLI 2024
HNUB UA HMOOV LEEJ NTSHIAB NPAS TOS LOS MAS YOS
COV LUS NYOB HAUV ZAM NTAWV MOO ZOO (Z 1: 45-51)
Kwv tij Hmoob sawv daws, hnub no lub Koom Txoos ua hmoov Leej Ntshiab Npas Tos Los Mas Yos los yog tus Zam sau hais tias ‘Nas Tas Nais’. Lub Moo Zoo hnub no thiaj yog zaj piav txog thaum Nas Tas Nais pom Huab Tais Yes Xus. Thaum ntawd, Huab Tais Yes Xus hais rau nws tias thaum Fis Lis Post sis tau hu koj, mas kuv twb xub pom koj lawm.
Kwv tij Hmoob sawv daws, zaj no zoo qhia peb tias ib txwm mas Huab Tais Tswv Ntuj yeej xub paub peb thiab pom tas txhua yam peb tau ua lawm. Huab Tais Tswv Ntuj nrog nraim peb mus li. Muaj ntau zaus Huab Tais Tswv Ntuj hais lus rau peb nruab siab tab sis peb tsis paub los yog tsis nco txog, mas Huab Tais Tswv Ntuj thiaj tso tej tus neeg tuaj ntsib peb thiab hu peb kom los paub Huab Tais Tswv Ntuj.
Tej zaus, Huab Tais Tswv Ntuj kuj cia peb ua nws rab twj coj Huab Tais Tswv Ntuj mus cuag tus neeg Huab Tais Tswv Ntuj xaiv xws li hnub no peb hnov tias Fis Lis Pos mus hais qhia rau Nas Tas Nais txog Huab Tais Yes Xus.
Txawm tias Huab Tais Tswv Ntuj xaiv peb mus ntsib lwm tus, los yog tshoj lwm tus kom tuaj hu peb; tab sis yog peb tsis qhib siab mas peb yeej yuav tsis pom Huab Tais Tswv Ntuj li.
Kwv tij Hmoob sawv daws, hnub no peb yuav qhib siab txais Huab Tais Tswv Ntuj tuaj nyob hauv peb, peb yuav zoo siab hlo cia Huab Tais Tswv Ntuj txib peb coj nws lub Moo Zoo mus cuag lwm tus.
Hnub no, peb ua hmoov cav txog Leej Ntshiab Npas Tos Los Mas Yos, mas peb yuav cev cov lus thov zoo li no rau Huab Tais Tswv Ntuj tias “Huab Tais, thov koj thiab kuv lub siab ntseeg kom nyob ruaj xws li koj tus Hauv Paus Xa Lus Npas Tos Los Mas Yos ntseeg txog koj thiab pheej xeeb rau koj Leej Tub mus li.”
