Zaj nyeem hnub tim 24 lub 2 hlis 2026
Hnub Peb, Lis Piam 1 caij Plaub Caug
Cov lus nyob hauv Mas Tais Ntawv Moo Zoo (MT 6: 7-15)
Kwv tij sawv daws, Huab Tais Yes Xus ib txwm teev Leej Txiv Tswv Ntuj tas mus li. Muaj qee zaus nws nce mus saum roob kom tau teev Ntuj, kom xwv nws tsa nws lub siab nyob ze Leej Txiv thiab paub txog Leej Txiv lub siab nyiam. Peb tsoom ntseeg yuav tsum xyaum coj Huab Tais Yes Xus tus yam ntxwv, ntau zaus peb xav paub txog Huab Tais Tswv Ntuj lub siab nyiam, kom peb coj lub neej tsis yuam kev. Hnub no Huab Tais Yes Xus tau qhia peb teev Ntuj, uas yog zaj teev Ntuj uas zoo tshaj plaws. Huab Tais Yes Xus hais tias : thaum nej thov Ntuj los yog teev Ntuj nej tsis txhob hais rov mus rov los, tsis yog hais lus ntau thov ntau es Tswv Ntuj yuav mloog. Kev thov Ntuj tsis yog thov yam ub yam no rau yus tus kheej xwb, tiam sis, yog kev cav lus zoo txog Leej Txiv Tswv Ntuj ua ntej, tom qab ntawd peb mam li thov kom Tswv Ntuj pub mov rau peb noj, thiab thov tej yam uas peb xav tau. Tsis tas li ntawd peb yuav tsum txawj sib zam, peb yuav zam rau luag tej zoo yam li Tswv Ntuj tau zam rau peb. Tus neeg uas tsis fim nrog Tswv Ntuj ces nws lub neej yuav ntsib kev tsaus ntuj nti, zoo li tus neeg uas tsis muaj txoj kev ntseeg, tus neeg uas tsis txawj zam rau luag tej, ces yog nws tsis txawj fim Ntuj, qhov kawg nws rov txiav nws hauv kev uas yuav mus cuag Tswv Ntuj tau. Li ntawd, thov kom peb yuav tsum ua lub neej npuab Tswv Ntuj tiag tiag, peb thiaj tsis yuam kev mog. Nyob zoo sawv daws.
