ZAJ NYEEM HNUB TIM 24 LUB 10 HLI 2024
HNUB NCO TXOG LEEJ NTSHIAB TUAM MAB LIAB KAS LES
COV LUS NYOB HAUV LUS KAS NTAWV MOO ZOO (LK 12: 49-53)
Kwv tij Hmoob sawv daws, vim Tswv Ntuj hlub lub qab ntuj neeg mas Tswv Ntuj thiaj xa nws Leej Tub uas yog Huab Tais Yes Xus tuaj tuag txhiv lub qab ntuj neeg. Huab Tais Yes Xus nyiam peb tas npaud, nws thiaj yeem ris kev txom nyem thiab tuag saum Ntoo Cuam. Tab sis ua cas lub Moo Zoo hnub no Huab Tais Yes Xus hais tias nws coj hluav taws tuaj rau lub ntiaj teb thiab nws coj kev sib ncaim tuaj.
Kwv tij, hais txog hluav taws mas peb yeej paub zoo tias hluav tawv cig kom qhov tsaus ntuj pom kev, kom qhov txias sov tuaj. Hluav taws hlawv tej yam tawv kom muag, hluav taws kub yam tsis huv kom huv tuaj. Hluav taws muaj txiaj ntsim thiab kuj muaj txim tib si.
Hnub no Huab Tais Yes Xus thiaj hais tias nws coj hluav taws tuaj rau lub ntiaj teb, kuj yog Huab Tais Yes Xus tuaj hlawv ntiaj teb qhov txhaum, tuaj tsom qhov pom kev rau lub ntiaj teb, tuaj pub lub siab kub lug rau ntiaj teb neeg kom neeg hloov lub neej tshiab.
Kwv tij, Huab Tais Yes Xus yog Tswv Ntuj, nws yog qhov zoo txhij. Yog li mas thaum peb ntseeg txog Yes Xus lawm, peb thiaj yuav muaj kev sib ncaim; yog ncaim ntawm kev phem kev tsis zoo.
Huab Tais Yes Xus nqua hu peb kom ncaim ntawm qhov tsis zoo tiag tiag mas peb thiaj yuav taug tau Tswv Ntuj txoj kev. Huab Tais Yes Xus thiaj hais tias “Nyob hauv ib tsev neeg, ob leeg yuav tiv peb leeg; txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab thiab nyab yuav tiv poj.”
Peb thov Tswv Ntuj kom nyob hauv peb tsev neeg, hauv peb pab pawg; kom peb sawv daws muaj ib lub siab ib lub tswv yim taug tib txog kev, mas peb thiaj yuav nyob ua ke tau sib haum xeeb. Peb thov Tswv Ntuj pub lub zog rau peb kom muaj cuab kav tiv tau txoj kev phem kev tsis zoo tuaj raug rau peb. Peb thov Tswv Ntuj tso hluav taws los hlawv peb lub siab kom kub lug thiab hlawv peb cov txhaum kom peb huv tuaj, peb thiaj yuav taug tau Tswv Ntuj txoj kev.
