ZAJ NYEEM HNUB TIM 23 LUB 10 HLI 2024
HNUB NCO TXOG LEEJ NTSHIAB ZAM KAS PIS TAS NOS
COV LUS NYOB HAUV LUS KAS NTAWV MOO ZOO (LK 12: 39-48)
Kwv tij Hmoob sawv daws, lub Moo Zoo hnub no yog cov lus txuas ntu nag hmo; yog hais txog lub caij Huab Tais Yes Xus yuav rov los, yog lub caij peb tso lub ntiaj teb tseg. Huab Tais Yes Xus ntuas peb npaj kom txhij.
Nag hmo peb hais tias peb yuav tau sia siv thiab taws teeb tos; yam li mloog Tswv Ntuj Lo Lus thiab teev Ntuj. Hnub no Huab Tais Yes Xus tau hais ib yam ntxiv; yam ntawd peb pom nyob hauv Huab Tais Yes Xus cov lus hais rau Pob Zeb tias “Leej twg yog tus tub txib pheej xeeb thiab xyuam xim uas tus tswv tsev yuav tsa nws saib tus tswv cov tub zog? Tus ntawd yog tus uas thaum tus tswv rov los txog, tus tswv pom nws tab tom lis nws tej dej num.”
Huab Tais Yes Xus lo lus no thiaj yog ntuas peb kom muab siab rau leg cov hauj lwm Huab Tais Yes Xus muab rau peb; yam li tus ua Leej Choj mas nws yuav muab siab rau leg nws txoj hauj lwm cev txim rau Tswv Ntuj, tus ua Vaj mas nws kuj yuav muab siab rau leg nws txoj hauj lwm saib xyuas nws tsoom pej xeem, tus ua Yaj Saub mas nws kuj yuav muab siab rau tshaj Tswv Ntuj cov lus rau sawv daws.
Kwv tij Hmoob, peb hais txog cov Leej Choj, cov Vaj, thiab cov Yaj Saub; yog li cov pej xeem neeg ntseeg xws li sawv daws, lawv yuav leg txoj hauj lwm dab tsi?
Kom nej nco tias txij hnub nej txais lub Cim Ntxuav lawm, nej tau lub hwj chim ua Leej Choj, ua Vaj, thiab ua Yaj Saub. Li ntawd, nej thiaj muaj txoj kab xwm ua Leej Choj, ua Vaj, thiab ua Yaj Saub nyob hauv nej tsev neeg, hauv nej pawg kwv tij, hauv nej pawg ntseeg, hauv nej lub zos.
Txhua tus neeg ntseeg thiaj yuav tau muab siab rau leg cov hauj lwm ua ib tug neeg ntseeg; yam li muab siab rau cev peb lub neej ua cov txim rau Tswv Ntuj, muab siab rau saib xyuas ntiaj teb neeg nyob hauv kev sis nyiam sis hlub, muab siab rau mloog thiab tshaj lub Moo Zoo rau lwm tus.
Kwv tij Hmoob, peb cov neeg ntseeg mas peb paub tias peb muaj txoj hauj lwm zoo li ntawd, yog peb tsis ua raws li txoj hauj lwm Tswv Ntuj txib peb ua, mas txog hnub peb mus ntsib Tswv Ntuj, peb yuav raug txim raws li cov lus Huab Tais Yes Xus hais tias “Tus tub txib uas nws yeej paub qhov uas tus tswv xav kom ua tab sis nws tsis npaj dab tsi li thiab tsis tau ua raws li qhov uas tus tswv xav kom ua, mas tus tub txib ntawd yuav mam tus tswv rab nplawm ntau teg.”
