ZAJ NYEEM HNUB TIM 22 LUB 8 HLI 2024
HNUB NCO TXOG NIAM MAB LIAB UA POJ HUAB TAIS
COV LUS NYOB HAUV MAS TAIS NTAWV MOO ZOO (MT 22: 1-14)
Kwv tij Hmoob sawv daws, hnub no peb cov neeg ntseeg hauv lub Koom Txoos Kav Tos Liv yuav nco txog niam Mab Liab ua Poj Huab Tais. Tos peb saib niam Mab Liab ua Poj Huab Tais vim tias peb ntseeg tias Mab Liab yug los tsis muaj txhaum, nws yog ib tug nkauj ntshiab thiab Huab Tais Tswv Ntuj tau npo nws lub cev thiab nws tus plig mus nyob saum ntuj lawm.
Kwv tij Hmoob, lub Moo Zoo hnub no mas Huab Tais Yes Xus hais zaj paj lug txog tus vaj caw sawv daws tuaj koom lub ntees tshoob; yog tuaj nyob hauv Tswv Ntuj lub Ceeb Tsheej los yog peb hais tias mus nyob saum ntuj xws li niam Mab Liab tau mus saum ntuj. Tswv Ntuj hu sawv daws tsis hais tus zoo los tus phem, tab sis tus tsim nyog yuav tau nyob hauv lub ntees tshoob los yog nyob hauv lub Ceeb Tsheej mas yog tus hnav tsoos noj tshoob. Tus hnav tsoos noj tshoob yog tus hnav lub siab tshiab, tus tau ntxhua nws tus ntsuj plig kom ntshiab txaus vim Tswv Ntuj lub Ceeb Tsheej yog thaj chaw ntshiab.
Cov kwv tij, Huab Tais Leej Txiv xa Huab Tais Leej Tub tuaj tuag txhiv ntiaj teb neeg. Huab Tais Leej Tub muab nws cov ntshav los zawv peb cov txhaum kom txhob tsuas rau peb tus ntsuj tus plig, mas peb thiaj ntshiab tuaj. Thaum peb tig los ntseeg txog Yes Xus, peb txais lub Cim Ntxuav nyob hauv Huab Tais Yes Xus lub Koom Txoos lawd, tsis yog tias peb tau kev cawm lawm. Tseem tshuab qhov tias txij hnub peb txais lub Cim Ntxuav los txog niaj hnub no, peb puas npaj lub siab kom ntshiab, peb puas npaj peb cev ris tsho noj tshoob kom txhij.
Peb yuav ua zoo li niam Mab Liab; ua tus neeg me yeem mloog Tswv Ntuj lus, tsob hwb luag tej, raws nraim Huab Tais Yes Xus mus kom txog lub roob Nkos Nkos Tas, tso siab rau Huab Tais Tswv Ntuj, nyob nraim hauv Yes Xus lub Koom Txoos.
Hnub no, niam Mab Liab tau ua Poj Huab Tais nyob ntawm nws Leej Tub peb tus Huab Tais Yes Xus Pleev ib sab lawm, peb yuav vam txog niam Mab Liab pab nrog thov Ntuj rau peb, thov kom Huab Tais Leej Txiv pub nws lub txiaj ntsim rau peb kom txawj ua neeg me, mloog Tswv Ntuj Lus, ntseeg ruaj, nyiam tsob hwb luag tej lwm tus xws li Mab Liab mas peb thiaj tsim nyog chaw mus koom rooj tshoob hauv Tswv Ntuj lub Ceeb Tsheej.
