Zaj nyeem hnub tim 22 lub 6 hli 2026 (Hnub nco txog Leej Ntshiab Zam Fis Ses thiab Tos Mas).

ZAJ NYEEM HNUB TIM 22 LUB 6 HLI 2026

HNUB NCO TXOG LEEJ NTSHIAB ZAM FIS SES THIAB LEEJ NTSHIAB TOS MAS MAUS LAWS

COV LUS NYOB HAUV MAS TAIS NTAWV MOO ZOO (MT 7: 1-5)

            Kwv tij Hmoob sawv daws, hnub no peb hnov Huab Tais Yes Xus hais rau cov thwj tim tias “Nej txhob txiav txim, Ntuj thiaj tsis txiav txim rau nej. Nej txiav txim li cas rau luag, Ntuj yuav txiav txim li ntawd rau nej.”

            Huab Tais Yes Xus hais li no tsis yog kom peb pom luag tej ua txhaum ua yuam kev, ces cia peb nyob twj ywm tsis hais dab tsi, tab sis Huab Tais Yes Xus xav kom peb xub muab siab rau ntsuas peb ua ntej tso, peb mam li mus txiav txim rau luag. Yog peb twb tau ua txhaum ua yuam kev xws li lawv, mas puas tsim nyog peb yuav ua tus txiav txim ua tus ntuas lawv. Huab Tais Yes Xus thiaj li hais tias “Ua cas koj ntsia tus quav nplej nyob hauv koj tus kwv qhov muag. Tab sis tus nqaj tse nyob hauv koj qhov muag, koj ho tsis pom! Koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag.”

            Kwv tij Hmoob, peb rov tig los saib hauv peb, saib puas muaj qees zaus peb pom cov nyob ib ncig ua tej yam tsis zoo, ces peb tseem siv muab lawv coj mus hais li ub li no, los yog coj mus taug xaiv rau lwm tus mloog.

            Yog peb ua zoo li hais, mas thov peb tso tseg, peb yuav hloov lub tswv yim thiab kev xav dua tshiab. Peb pom luag ua tsis zoo, mas tsim nyog peb yuav tig los soj hauv peb, saib puas muaj tej yam peb tau ua tsis zoo li luag, yog muaj mas peb kav tsij kho, thiab peb thov Ntuj pab peb thiab tus ntawd kom tso tau qhov tsis zoo pov tseg. Peb muab lub siab hlub mus ua zoo hais rau nws, qhia nws kom pom txog qhov zoo qhov phem.

            Nyob zoo sawv daws.