ZAJ NYEEM HNUB TIM 22 LUB 10 HLI 2024
HNUB NCO TXOG LEEJ NTSHIAB VAJ QHIA ZAM PAJ LUG OB
COV LUS NYOB HAUV LUS KAS NTAWV MOO ZOO (LK 12: 35-38)
Kwv tij Hmoob sawv daws, hnub no Huab Tais Yes Xus ntuas peb kom zov hmo; yam li npaj kom txhij tos lub caij Huab Tais Yes Xus yuav rov los. Huab Tais Yes Xus hais tias “Nej sia siv thiab taws teeb zoo li ib co tub txib tos lawv tus tswv mus ua tshoob rov los.”
Kwv tij, lub caij Huab Tais Yes Xus yuav rov los yog thaum twg? Peb puas yuav muaj txoj sia nyob ntev txog thaum ntawd?
Ib txhia hais tias lub caij Huab Tais Yes Xus yuav rov los mas yog lub caij ntiaj teb kawg, ces sawv daws thiaj hais tias yog thaum tsis muaj lub ntiaj teb no lawm; yam li lub ntiaj teb tawg los yog neeg nyob tsis tau hauv lub ntiaj teb no ntxiv. Tab sis ntawm peb cov neeg ntseeg mas peb hais tias lub caij Huab Tais Yes Xus yuav rov los yog lub caij peb txoj sia no tu, yog lub caij peb tso ntiaj teb tseg.
Muab hais li no ces peb thiaj paub tias txhua tus neeg yeej yuav pom lub caij Huab Tais Yes Xus rov los. Tej tus mas yog los txog sai sai, tej tus mas yuav tos ntev. Lub caij Huab Tais Yes Xus rov los ntawm koj thiab kuv thiaj tsis yog tib lub sij hawm. Li ntawd, peb txhua tus tsis paub tias ntawm peb ntiag tug mas lub caij peb tso ntiaj teb tseg yog thaum twg thiab lub sij hawm twg. Vim li ntawd, Huab Tais Yes Xus thiaj hais kom peb zov hmo; yam li npaj kom txhij.
Yav thaum ub, Tswv Ntuj kom cov His Xas Lais sia siv thiab taws teeb npaj sawv kev tawm hauv teb chaws Hais Nkws Tos mus txais lub neej tshiab ua neeg twj lij nyob lub teb chaws Tswv Ntuj cog lus yuav pub rau lawv; nyem no Huab Tais Yes Xus txhib peb kom siav siv thiab taws teeb npaj tos nws yuav rov los cuag peb.
Nyob hauv lub Moo Zoo hnub no Huab Tais Yes Xus tsis hais kom peb npaj tawm mus tsim koob hmoov, tab sis kom peb npaj tos nws yuav rov tuaj. Yog thaum Huab Tais Yes Xus tuaj txog, nws pom peb sia siv thiab taws teeb tos nws, mas Huab Tais Yes Xus yuav sia siv rau peb thiab tuav peb tes mus zaum ntawm rooj mov, ces Huab Tais Yes Xus yuav rau mov rau peb noj.
Sia siv thiab taws teeb hauv lub Moo Zoo hnub no tiaj yog npaj tsob hwb Tswv Ntuj; yam li mloog Tswv Ntuj Lo Lus thiab teev Ntuj tsis tseg.
