ZAJ NYEEM HNUB TIM 21 LUB 10 HLI 2024
HNUB OB LUB LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 13-21)
Kwv tij Hmoob sawv daws, thaum nej hnov Huab Tais Yes Xus zaj paj lug hauv lub Moo Zoo hnub no tas mas nej xav li cas, zaj no zoo ntuas dab tsi rau nej?
Ntawm peb mas peb xav tias Huab Tais Yes Xus tab tom qhia peb kom hloov lub tswv yim tshiab hais txog nyiaj txiag cuab tam. Raws li lub ntiaj teb zaj tswv yim, mas peb nquag hnov hais tias ua neej nyob ces nrhiav kom tau nyiaj ntau ntau, tsim vaj tsev kom zoo nkauj, yuav tsheb zoo zoo los caij kom mus qhov twg los yooj yim thiab luag thiaj qhuas, muab nyiaj txiag coj mus tso hauv txhab ceev nyaj mas nyiaj thiaj tsis ploj.
Kwv tij, hnub no Huab Tais Yes Xus hais tias yog peb muab tas lub neej mus nrhiav nyiaj kom muaj cuab tam ntau, mas txog hnub peb tso lub ntiaj teb no tseg lawm, peb nqa mus puas tau, peb puas yuav muaj sij hawm siv tej nyiaj ntawd. Peb nrhiav tau nyiaj ntau, peb muab coj mus siv ua si raws li siab ntshaw, tab sis txoj kev lom zem ntawd puas pab tau peb kom siab kaj mus li. Peb muaj nyiaj muaj txiaj ntau nyob ntiaj teb no, tab sis nyob saum ntuj peb puas nplua nuj li nyob ntiaj teb no.
Vim neeg lub siab ntshaw, mas neeg thiaj huas yam ub yam no los ua neeg lub cuab tam, neeg khaws tas txhua yam neeg nrhiav tau los ua neeg tug. Hnub no Huab Tais Yes Xus qhib lub tswv yim tshiab rau peb kom txhob ua li ntawd. Peb yuav tau pub yam peb muaj rau cov tsis muaj, mas peb thiaj yuav ua tus neeg nplua nuj nyob saum ntuj.
Tus twg yim pub ntau mas tus ntawd yim muaj ntau. Tus twg yim pab luag tej mas nws yim tau kev pab coob.
Kwv tij Hmoob, nej sim saib hauv Hmoob lub ntees ploj ntees tuag mas, nej yuav pom tias tus neeg twg thaum tseem ua neej nyob, nws nquag nquag tawm rooj mus pab lwm tus, mas txog hnub nws tso lub ntiaj teb no tseg yuav muaj neeg tuaj saib tuaj xyuas nws coob. Tus neeg twg tsis tawm rooj mus pauv lwm tus zog, mas thaum txog nws yuav muaj neeg tuaj pab nws puas tsawg tug?
Kwv tij Hmoob, kom nej nco tias cuab tam tsis yog nyiaj txiag xwb, yus lub dag lub zog los kuj yog cuab tam, yus lub tswv yim los kuj yog cuab tam, yus rab peev xwm los kuj yog cuab tam. Li ntawd, peb muaj yam twg mas peb txhob muab khaws cia, peb yuav tau thau los pub thiab pab lwm tus.
Kwv tij, kev pub rau lwm tus xwb thiaj yuav ntxuav tau peb lub siab ntshaw pov tseg, kev pab lwm tus xwb thiaj yuav ua kom peb nplua nuj nyob hauv Tswv Ntuj.
Hnub no, nej yuav khaws Huab Tais Yes Xus lo lus no cia “Nej ceev faj, nej yuav txuag kom nej txhob ntshaw, vim tias neeg txawm nplua nuj npaum twg, los nws txoj sia tsis nyob hauv nws lub cuab tam.”
