ZAJ NYEEM HNUB TIM 20 LUB 8 HLI 2024
HNUB NCO TXOG LEEJ NTSHIAB NPES NAS
COV LUS NYOB HAUV MAS TAIS NTAWV MOO ZOO (MT 19: 23-30)
Kwv tij Hmoob sawv daws, Huab Tais Yes Xus hais tias ib tug ntxhuav yuav nkag hauv ib lub qhov koob mas tseem yooj yim dua ib tug neeg nplua nuj mus hauv Ntuj lub Ceeb Tsheej. Qhov tseeb mas tsis yog neeg nplua nuj xwb, tshua tus neeg yeej ceeb laj mus tau hauv Ntuj lub Ceeb Tsheej. Huab Tais Yes Xus cov thwj tim los lawv kuj xav li ntawd, lawv thiaj hais tias yog li leej twg thiaj yuav tau txais kev cawm.
Kwv tij Hmoob, yog peb vam txog peb lub tswv yim los peb rab peev xwm xwb mas peb yeej yuav must sis tau hauv Ntuj lub Ceeb Tsheej kiag li. Tab sis vim Huab Tais Tswv Ntuj hlub peb, mas Huab Tais Tswv Ntuj thiaj pub nws Leej Tub uas yog Huab Tais Yes Xus tuaj ua txoj kev coj peb mus kom txog Ntuj lub Ceeb Tsheej, tsuav yog peb ntseeg thiab tso siab rau Huab Tais Yes Xus xces peb raws Huab Tais Yes Xus qab.
Thaum ntawd, cov thwj tim ntseeg thiab tso siab rau Huab Tais Yes Xus tias Huab Tais Yes Xus yuav yog tus cawm lawv, mas lawv thiaj tso vaj tse, tso niam tso txiv, tso poj niam me nyuam, tso lawv cov hauj lwm los raws Huab Tais Yes Xus.
Pob Zeb xav paub tias lawv tso tas txhua yam pov tseg kom tau raws Huab Tais Yes Xus, mas lawv yuav tau dab tsi?
Huab Tais Yes Xus teb tias “Nej mas nej yuav tau zaum saum cov His Xas Lais 12 lub theej kiab. Nej yuav tau txais tas txhua yam nej tau tso pov tseg ntawd, thiab tseem tau ntau tshaj qhov nej tso pov tseg. Nej kuj tseem yuav tau txais txoj sia nyob mus li.”
Tab sis thaum ntawd, cov thwj tim ntseeg thiab tso siab tias Huab Tais Yes Xus hais txog lub neej nyob hauv ntiaj teb no, lub neej tom qab lawv cawm cov Los Mas tawm hauv lub teb chaws. Lawv ntseeg tias Huab Tais Yes Xus yog tus Pleev cawm lawv haiv His Xas Lais. Huab Tais Yes Xus yog tus yuav sawv ua vaj His Xas Lais, ces lawv yuav muaj koob nto npe, zaum ntawm tus vaj His Xas Lais ib sab.
Nyem no peb paub lawm tias Huab Tais Yes Xus tsis yog hais txog lub neej nyob ntiaj teb no, tab sis Huab Tais Yes Xus hais txog lub neej tom qab peb tso lub ntiaj teb no tseg. Tus twg nws ua neej nyob, nws tso nws cov cuab tam tseg vim txoj kev ntseeg txog Huab Tais Yes Xus, mas nws yuav tau txoj sia nyob mus li nyob saum ntuj, nws yuav tau nws cov cuab tam nyob saum ntuj.
Qhov no tsis yog tso vim yus xav dim lub nras tu yus niam yus txiv thaum laus, los yog dim tes ntawm yus tsev neeg kom tau mus ua lwm yam ywj siab. Tab sis tso txhua yam tseg kom tau tsob hwb Tswv Ntuj, tsob hwb lwm tus, tau nyiam cov neeg nyob ib ncig.
