ZAJ NYEEM HNUB TIM 20 LUB 4 HLIS, HNUB XYA LUB LIS PIAM 3 CAIJ HLA
COV LUS NYOB HAUV ZAM NTAWV MOO ZOO (Z 6: 60-69)
Kwv tij, thaum peb cov kwv tij Hmoob ua neeg thoj nam nyob hauv cov yeej tawg rog, cov nom tswv txawv teb chaws yuav tos txais peb Hmoob mus nyob rau lawv teb chaws, mas peb Hmoob rov sib hem tias ‘cov neeg tawv dawb yog cov neeg noj neeg, lawv yuav coj peb Hmoob mus tua ua nqaij noj’. Thaum Hmoob sib hem li no mas ib txhia thiaj tsis kam tsiv mus rau cov teb chaws neeg tawv dawb. Cov kam rau npe mus tsuas yog cov neeg txawj ntse thiab tsis qaug qav rau txoj kev sib hem xwb. Tom qab no cov kwv tij Hmoob nyob qub qab mam paub tias tsis muaj tseeb xws li Hmoob cov lus sib hem, ces ziag no lawv xav mus los mus tsis tau lawm. lig dhau rau lawv lawm.
Thaum Huab Tais Yes Xus cov thwj tim hnov Huab Tais Yes Xus hais tias lawv yuav tsum noj Yes Xus lub cev thiab hauv Yes Xus cov ntshav mas lawv thiaj yuav muaj txoj sia, ces muaj ib pab thwj tim tsis kam ntseeg ntxiv, lawv rov sib hem lawv thiab lawv tsis qhib lawv lub tswv yim mloog, lawv tso Huab Tais Yes Xus tseg.
Peb cov kwv tij Hmoob thiab tsoom sid raws Huab Tais Yes Xus xav xws tib yam, tsuas muaj cov tso siab xwb thiaj tsis plam lub zoo caij ntawd.
Kwv tij Hmoob, peb yuav thov Huab Tais Tswv Ntuj pub kev thoob tsib rau peb, kom peb to taub zoo txog Tswv Ntuj Lo Lus peb tau hnov tau mloog, thiab thov Tswv Ntuj lub txiaj ntsim los roos peb kom peb ntseeg ruaj ntseeg khov tias Huab Tais Yes Xus yog Tswv Ntuj Leej Tub nqes saum Ntuj los, nws lub cev thiab cov ntshav yog cov tseem mov tseem dej yug peb tus ntsuj plig kom muaj sia tau tiag, ces peb yuav hais xws li Xis Moos Pob Zeb hais tias “Huab Tais, peb ntseeg thiab peb paub tias koj yog Tswv Ntuj tus Ntshiab.”
