ZAJ NYEEM HNUB TIM 20 LUB 12 HLIS 2025
HNUB XYA, LIS PIAM 3 CAIJ TOS HUAB TAIS
COV LUS NYOB HAUV LUS KAS NTAWV MOO ZOO (LK 1: 26-38)
Nyob rau hauv zaj no, lub Moo Zoo qhia kom peb yuav tsum saib Mab Liab tus yam ntxwv ua ib tug qauv rau peb taug, vim Mab Liab yog ib tug neeg coj zoo thiab txawj mloog lus. Tab lub sij hawm ntawd, nws yog ib tug me nyuam ntxhais xwb tsis kav, thaum nws tau hnov Tswv Ntuj tus Tshiab cov lus, nws qhib siab mloog thiab txais Tswv Ntuj cov lus. Nws paub tias qhov tus Tshiab hais rau nws yog ib txoj hauj lwm tseem ceeb, nws khaws cov lus cia nraim hauv siab, ces nws yuav siv tas nrho nws lub neej thiab txoj sia los fi rau Tswv Ntuj. Txij hnub ntawd los nws tsis coj lub neej ua dog ua dig, nws kub siab ua raws li Tswv Ntuj tau txib nws, nws coj lub neej taug txoj kev ntshiab, nws coj tus yam ntxwv ntxim Tswv Ntuj siab.
Kwv tij hmoob sawv daws, peb yuav tsum txawj mloog Tswv Ntuj cov lus thiab coj los siv nyob rau hauv peb lub neej. Peb yuav tsum ntseeg ruaj tias, Tswv Ntuj cov hauj lwm yog txoj hauj lwm tseem ceeb, uas peb yuav tso pov tseg tsis tau. Peb yuav tsum coj lub neej npuab Tswv Ntuj. Lub paj twg yog nws raug de ntawm tsob ntoo lawm, txawm nws yuav zoo nkauj npaum cas los, nws tsuas tos hnub zee lawm xwb. Ib tug neeg ntseeg yog ncaim ntawm Tswv Ntuj, ces nws kawg nyob tosh nub tuag lawm thiab xwb. Li ntawd, peb yog Tswv Ntuj haiv neeg, peb yuav tsum coj lub neej zoo yam li cov neeg ciaj sia.
Peb yuav tsum zoo siab qhib siab txais Tswv Ntuj tuaj nyob rau hauv peb lub neej txhua txhia hnub, ces Tswv Ntuj yuav coj peb thiab hloov peb kom peb muaj ib lub neej tshiab nyob hauv Tswv Ntuj.
Kev ua ib tug neeg ntshiab neeg huv, tsis yooj yim, li ntawd, peb yuav tsum siv zog los tswj peb lub siab thiab hloov peb lub neej kom haum lub Moo Zoo, mas qhov kawg peb thiaj yuav coj tau ib lub neej ntshiab.
