ZAJ NYEEM HNUB TIM 2 LUB 9 HLI 2024
HNUB OB LUB LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 4: 16-30)
Kwv tij Hmoob sawv daws, txij lub lis piam 22 caij Nruab Xyoo mus, mas lub Koom Txoos cev cov lus hauv Lus Kas phau ntawv Moo Zoo rau sawv daws tau coj mus xav tswv yim. Lub Moo Zoo hnub no yog Lus Kas sau piav txog thaum Huab Tais Yes Xus pib txoj hauj lwm tshaj txog Tswv Ntuj lub Ceeb Tsheej. Lub Moo Zoo piav tias Huab Tais Yes Xus rov los txog Nas Xas Les, thaum txog Hnub Xas Npas Tos, Huab Tais Yes Xus nrog nws tsev neeg mus mloog Tswv Ntuj Lo Lus hauv lub tsev txoos. Lawv caw Huab Tais Yes Xus mus nyeem cov lus hauv tus yaj saub His Xais phau ntawv, ces Huab Tais Yes Xus nrhiav tau cov lus His Xais tau tshaj cia ntau pua xyoo tias “Huab Tais lub tswv yim nyob saum kuv, vim nws pleev roj los qee kuv. Nws xa kuv mus tshaj lub Moo Zoo rau cov pluag, nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij, kom kuv tshaj tias yog xyoo Huab Tais yuav pub txiaj ntsim.”
Kwv tij, cov lus Huab Tais Yes Xus nyeem rau zeej tsoom mloog hnub ntawd, kuj yog cov lus ua pov thawj tias Huab Tais Yes Xus yog tus Tswv Ntuj xa tuaj cawm cov neeg pluag, cov neeg nyob txim, cov dig muag, cov raug luag yuam.
Yog tus neeg twg hloov siab tshiab mas Huab Tais Yes Xus lub hwj huam yuav hloov tau nws lub neej, nws yuav dim hauv kev tuag thiab ua kev txhaum qhev.
Kwv tij Hmoob sawv daws, Huab Tais Yes Xus tau ua raws li cov lust us yaj saub sau txog tus neeg uas Tswv Ntuj xa tuaj ua Tswv Ntuj txoj hauj lwm. Huab Tais Yes Xus hais rau lawv tias “Hnub no, cov lus nyob hauv zaj ntawv no tsheej xeeb raws li nej tau hnov.”
Kwv tij, thaum peb hnov los yog tau nyeem lub Moo Zoo hauv hnub no, Huab Tais Yes Xus lo lus no puas deeg txog peb siab? Huab Tais Yes Xus lo lus hnub no puas yog tab tom hais rau peb?
Cov kwv tij, peb yog ib tug neeg ntseeg txog Yes Xus, peb yog cov uas Tswv Ntuj xaiv, yog cov Tswv Ntuj tau pleev roj qee los ua Tswv Ntuj txoj hauj lwm. Txawm tus yog Leej Choj, tus yog Leej Phauj, los tus yog Leej Tsob Hwb, Xib Hwb, Tim Hwb, los yog ib tug neeg me me hauv lub Koom Txoos. Peb sawv daws yeej muaj tib txoj hauj lwm zoo xws tib yam; yog tshaj lub Moo Zoo rau luag lwm tus.
Yog li mas hnub no, peb lub tshaj xo ZOO TSWV ZOV YAJ xav kom nej niaj hnub ua txoj hauj lwm Tswv Ntuj pub rau nej ntawd mog.
