ZAJ NYEEM HNUB TiM 2 LUB 6 HLI 2025
HNUB NCO TXOG LEEJ NTSHIAB MAS XES LIS NIS THIAB LEEJ NTSHIAB POB ZEB TUAG UA TIM KHAWV
COV LUS NYOB HAUV ZAM NTAWV MOO ZOO (Z 16: 29-33)
Kwv tij Hmoob, nyob hauv zaj Ntawv Moo Zoo hnub no peb hnov cov thwj tim hais rau Huab Tais Yes Xus tias nyem no lawv ntseeg lawm tias Huab Tais Yes Xus tuaj ntawm Tswv Ntuj tuaj.
Tos lawv ntseeg, vim nyob hauv hmo ntawd, Huab Tais Yes Xus qhia ncaj ncaj rau lawv tias nws yog leej twg thiab nws tuaj ua txoj hauj lwm dab tsi. Hmo Huab Tais Yes Xus hais cov lus no yog hmo lawv noj pluas Hmo Hla, ces Huab Tais Yes Xus ntxuav cov thwj tim taw. Huab Tais Yes Xus qhia lawv tias yuav muaj ib tug muab nws muag, qhov kawg nws yuav tuag tab sis peb hnub nws yuav sawv rov los. Huab Tais Yes Xus qhia ib zaj tshiab rau lawv; yog kom lawv sis nyiam sis hlub. Tus twg pom Yes Xus mas tus ntawd pom Leej Txiv, tus twg xav paub tias Tswv Ntuj zoo li cas mas nws ntsia Huab Tais Yes Xus cov hauj lwm ces nws yuav paub tias Tswv Ntuj zoo li cas. Huab Tais Yes Xus mus lawm, nws kuj yuav xa Leej Ntuj Plig tuaj nyob hauv cov thwj tim, Leej Ntuj Plig yuav qhib lawv lub tswv yim kom nco tau txhua yam. Huab Tais Yes Xus kuj hais ntxiv tias ntiaj teb neeg nyiam ua phem, lawv ntxub qhov zoo, ces lawv ntxub Huab Tais Yes Xus; yog li mas cov ntseeg txog Huab Tais Yes Xus kuj yuav raug lub qab ntuj ntxub, tab sis lawv ua siab loj. Lawv yuav tu siab tab sis tom dab lawv yuav zoo siab.
Huab Tais Yes Xus hais tej lus li piav no, ces cov thwj tim pom tias Huab Tais Yes Xus cov lus tsis yog ntiaj teb neeg li lus, lawv thiaj ntseeg tias Huab Tais Yes Xus tuaj ntawm Tswv Ntuj tuaj tiag.
Cov thwj tim ntseeg, tab sis lawv yog neeg xwb mas lawv yeej tsis muaj zog nyiaj ris kev txom nyem, lawv yeej yuav tiv tsis tau dab phem kev ntxias. Li ntawd, Huab Tais Yes Xus thiaj hais rau lawv tias tos nws qhia tej ntawd rau lawv kuj yog nws xav kom lawv paub, ces thaum lawv poob rau kev ntxias, lawv nco tau tej no mas lawv yuav nyob thaj yeeb, lawv yuav rov tig los yuav siab tshiab tau. Lawv kuj yuav muaj ib lub zog loj, yog lawv vam txog Huab Tais Yes Xus vim Huab Tais Yes Xus yog tus yeej lub qab ntuj neeg.
Kwv tij Hmoob sawv daws, peb cov ntseeg nyob rau lub zim txwv no mas peb paub Huab Tais Yes Xus zoo dua cov thwj tim, vim peb muaj cov Ntawv Moo Zoo qhia peb txog Huab Tais Yes Xus. Li ntawd, peb thiaj ntseeg txog Huab Tais Yes Xus zoo dua lub caij thaum cov thwj tim nrog Huab Tais Yes Xus nyob. Lawv txoj kev ntseeg ruaj nreb tuaj yog thaum lawv pom Huab Tais Yes Xus sawv rov los lawm, hos peb mas peb tsis pom tab sis peb ntseeg. Huab Tais Yes Xus hais tias tus tsis pom tab sis nws ntseeg, mas nws tau txoj hmoov zoo.
Peb tau txoj hmoov zoo tiag. Tab sis peb kuj tseem zoo li cov thwj tim uas yog neeg tsis muaj zog, nyiam nyiam raug dab phem kev ntxias. Ntau zaus peb kuj tso tes khiav, tsis nco txog Huab Tais Yes Xus.
Txawm li ntawd, los Huab Tais Yes Xus xav kom peb nco tias thaud nws qhia cov thwj tim meej tias nws yog Tswv Ntuj, tsis kav lawv kuj tau ntog hauv kev ntxias vim lub siab ntshai, vim lub zog ntaug. Tab sis lawv nco txog Huab Tais Yes Xus cov lus ces lawv tig los yuav siab tshiab, lawv siab kaj tuaj, lawv tau nyob thaj yeeb. Ntawm peb mas zoo tib yam, peb paub Huab Tais Yes Xus, peb ntseeg txog Huab Tais Yes Xus, peb ntog hauv txoj kev txhaum, thaum peb nco txog Huab Tais Yes Xus mas peb tig los nrhiav, los khaub zig Huab Tais Yes Xus dua, vam txog Huab Tais Yes Xus pab, ces Huab Tais Yes Xus yuav pub kev thaj yeeb rau peb.
