ZAJ NYEEM HNUB TIM 2 LUB 1 HLIS: HNUB NCO TXOG LEEJ NTSHIAB NPAS XIS THIAB LEEJ NTSHIAB NQES NKOS LIS
COV LUS NYOB HAUV ZAM TSAB NTAWV, TSAB IB (1 Z 2: 22-28)
LUB MOO ZOO RAWS LI ZAM (Z 1: 19-28)
Cov kwv tij Hmoob, tus Hauv Paus Xa Lus Zam hais tseeb kawg tias tus tsis ntseeg tias Huab Tais Yes Xus yog Leej Pleev, mas tus ntawd yog tus tiv Leej Pleev. Tus tsis ntseeg tias Huab Tais Yes Xus yog tus Cawm ntiaj teb neeg mas tus ntawd tsis yog Tswv Ntuj cov me nyuam. Cov lus no yog cov lust as nrho cov neeg ntseeg txog Yes Xus tsis hais nyob lub Koom Txoos twg puav leej ntseeg zoo tib yam li ntawd.
Yog nyob nyob muaj tej tus neeg tuaj qhia ib zag tshiab tias lawv ntseeg Ntuj tab sis lawv tsis ntseeg tias Huab Tais Yes Xus yog Leej Pleev mas hais tau tias lawv tsis yog cov neeg ntseeg txog Yes Xus los raws li lub qab ntuj hais tias ‘Christian’.
Thov muab ib qho hais ua kev nkag siab rau peb sawv daws tias thaum peb hnov lo lus ‘Chistian’ mas yog hais txog tag nrho cov ntseeg txog Yes Xus, tsis hais Kav Tos Liv, Os Thos Dos, los yog Plos Tes Taas.
Cov ntseeg txog Yes Xus, lawv yog Huab Tais Yes Xus thwj tim, lawv ua tim khawv txog Huab Tais Yes Xus yam li tus Ntxuav Plig Zam hais tias “Kuv tsis yog Leej Pleev. Kuv yog tus neeg nyob hauv teb chaws quav poj lub suab qw tias nej ua kom Huab Tais txoj kev rov tiaj.”
Kwv tij, peb cov neeg ntseeg mas peb tsis yog Leej Pleev, peb tsis yog tus cawm lub qab ntuj neeg, peb tsis yog tus yuav txiav txim rau peb cov kwv tij. Cov neeg ntseeg tsuas yog tus ua tim khawv txog Huab Tais Yes Xus txoj kev cawm neeg rau lwm tus, yog tus qauv rau lwm tus pom kom lawv tig los ntseeg txog Yes Xus, kom lawv tau txais Leej Pleev txoj kev cawm.
Huab Tais Yes Xus yog qhov tseeb, mas peb cov ntseeg txog Yes Xus thiaj ua tim khkawv txog qhov tseeb; yam li peb ua neej mus raws li peb txoj kev ntseeg.
Huab Tais Yes Xus yog kev nyiam, mas peb cov neeg ntseeg txog Yes Xus thiaj ua tim khawv txog kev nyiam; yam li peb sis nyiam sis hlub.
Huab Tais Yes Xus yog kev vam khom, mas peb cov neeg ntseeg txog Yes Xus thiaj ua tim khawv txog kev vam khom; yam li peb ua neej nyob hauv kev tso siab.
Kwv tij, peb hais tias peb ntseeg txog Yes Xus, peb ua tim khawv txog Yes Xus tias yog tus Cawm peb, mas txhua hnub peb kuj yuav ua lub neej mus raws kev ncaj, ua zoo, nyiam thiab hlub cov nyob ib ncig, sib pab sib nres siab.
Nyob hauv lub xyoo 2025 no yog lub xyoo ntshiab; yog lub xyoo zoo rau peb tso lub qub neej pov tseg, tso tus cwj pwm phem nyob hauv qhov tsaus ntuj pov tseg, ces peb tig los ua lub neej tshiab, hloov tus cwj pwm tshiab mus raws kev ntshiab; kom tsim nyog lub npe tias peb ntseeg txog Yes Xus ua tus Cawm peb, peb yog Tswv Ntuj cov me nyuam.
Nyob zoo sawv daws.
